＊＊＊
原想在展覽期內寫好訪問，惜遇事擔擱至今，至憾。
參觀「勞力是」藝術展，原無他意，卻見穿著「莊臣」制服的姨姨，駐足在展覽門前。她是在 JCCAC 清潔的女工。
看到展覽對象，正是自己際遇，她有何感觸？
＊＊＊
圖一至三 娟姐
偶遇娟姐時，她正為「勞力是」展板，戴上自製的毛冷裝飾。
最初娟姐在工廠車衣，後產業北移，轉任清潔迨今十年，兩年前來到 JCCAC。看到藝術家工作，本有底子的她重萌興趣，順道自學，「都係毛冷尾水，廢物利用。」
她承認轉職之初，也受世俗之眼光影響，「人係咁架，好唔接受。搵唔到其他，覺得人地睇小自己。」
後來終於釋然：「係自己睇唔起自己，先覺得人地都睇唔起自己。清潔係咪好低微嘅工作？我覺得做嘢唔係咁，咩工都一樣，人最緊要尊重自己同份工。」
「做咩冇所謂，我唔係偷唔係搶，咪就係做清潔，唔好睇唔起自己。」
但筆者無奈。我們平素對清潔工人，紙皮婆婆都視若無睹，恍若廁所街道，都由機械自動打掃；更有下者，還會諸多奚落，諸多刁難。
「佢地唔尊重自己啫。我憑自己嘅勞力搵錢，依然有餐飽飯食，好開心。」
她笑道：「如果我自己都歧視自己，我就唔做喇。我份人就係咁，好自我架。我成日同人講，如果你叫我做份工，依然話我做唔好，鬧我三次就唔會做。」
「有啲地方做清潔好嚴，唔俾人傾偈，一傾就會鬧。我唔鍾意俾人鬧，做嘢做到好足，老闆就唔會啄住。你做份工，係有責任做到最好。」
「做乜嘢工都有尊嚴，唔係人地唔俾就冇。最重要嘅唔係人地，而係自己，尊嚴係自己俾。」
然而客觀的尊嚴，如標準工時，最低工資，娟姐卻不甚在意，「好難講。。。點解老細俾清潔咁低人工？因為清潔好容易上手。」
筆者罕有地不同意，「香港冇梁振英會繼續運作；但冇清潔姨姨就會冧」。辛苦和回報不成正比，替她們不值。
娟姐答：「世界冇公道依樣嘢。讀唔到書，冇呢樣技能，就做唔到。少人可以做嘅嘢，冇咁多人爭，銀紙就會多；通街大把人做，人工就會低，社會就係咁。」
儘管她也明白，政府旗下物業，幾乎都將清潔外判，判上判令人工更低，但她早已習慣。
「社會愈先進，愈讀得多書嘅人，就愈諗得多依啲嘢。。。你太後生。我由 71 年做到而家，你話做左幾多年嘢？世界係咁架喇。當你為需要而去做，就會做得開心；當你覺得辛苦而抗拒；就會做得唔開心。你樂觀就會咁講，接受先會快樂。」
然而娟姐亦留餘地：「依個係我意見啫，其他人未必咁諗，人係唔會相同。」
「人唔可以講絕對嘅說話，講左絕對嘅話，第日就會自己摑自己。人嘅經歷，最重要就係嚟改變自己。上左年紀嘅人唔會改變。」
最後問她對怎看展覽，她又忍不住笑：「我冇點正式睇，做緊嘢架」，「俾人認識吓都好嘅，尤其係細路仔，要由細個改變。帶佢地認識跌倒冇所謂，唔做依份，做第二份工都係得嘅。」
＊＊＊
圖四 謝至德
謝解釋他與樂施會已合作兩次，第一次的「看懂、看不懂」，道出少數族裔學習中文的困境，回響不賴，樂施會再邀他為在職貧窮策展。
「上一次好急，只有半年時間，只能用自己專長攝影來說話；今次就有一年時間，可以俾我再搵其他媒介嘅藝術家。多啲唔同藝術，雕塑、繪畫等等，有多啲切入點，軟性的手法更容易令人理解。」
何以用名人作角色扮演？謝說：「當你見到知名人物比如牛丸，卻著住速遞衣。形象入左觀眾腦海，第日再見到牛丸抑或速遞員，都會意識到其他工種存在。希望能夠將視而不見嘅現象，再呈現係觀眾眼前。」
（筆者好感觸，原來謝先生和自己，皆用同一款廉價副廠鏡，成果卻差天共地。人比器材重要，但執迷者永遠逐末）
＊＊＊
圖五 陳巧真與拍檔
「之前都未跟過人『倒樓』＊，因為工會介紹陳生陳太俾我認識，完全意想不到，就同朋友一齊去拍。」
（註：屋邨的清潔工人，每天清理全幢大廈所有住戶的垃圾）
「每個人做嘢都好辛苦，問題係清潔工受到好多剝削，工作嘅辛勞需要合理公平嘅對待。」
拍檔忍不住插口：「其實拍電影同做地盆差唔多，都係搬搬抬抬。我地都係低下階層嚟架。。。」
＊＊＊
圖六 侯紹政作品：《勞工也是社會的主人翁》；《速遞服務員的歲月生涯》。
＊＊＊
圖七、圖八李紹忠作品：《安全網的漏洞》。網中的散紙正是一小時的最低工資。
＊＊＊
下為朋友的遭遇：
『見到有小朋友好乖咁執起地下啲垃圾去垃圾桶，點知。。。
母（兇狠地）：「你仲乜執埋人地啲垃圾呀？好得閒呀你？執哂地下啲垃圾吖好無？」』
究竟香港是什麼？
前幾天曾俊華突在上水開 live，家住得近，立即撲過去，想即場追問選委的質疑。遍尋不獲，廢然而回。歸途路經李婆婆的工作間，告之新聞刺針的訪問，看過的人已逾五十萬。她頗高興，不迭說當時只擔心訪問出街，惹政府麻煩自己，慶幸無恙。
懶惰的筆者已經很久沒幫李婆婆。依然記得一次幫婆婆推車到回收站，收廢紙的女人譏刺我，「想幫佢俾錢咪得囉。」
熟識李婆婆都知她不算窮，大家都勸她退休，她說已經折衷，延至下午才出門。但習慣始終如一，背後是一段又一段傷痛。筆者當然不會說出來，大家不妨親身去問，也許婆婆會告訴您，由耕田到捉賊，無數往事，滔滔不絕。她需要的不再是錢，而是噓寒問暖、傾偈和支持。
無奈世態多屬炎涼，心懷種種定見，自己亦不倖免。
若共同體的存在，需要彼此分擔義務，互相承認權利，但無數港人卻無視困苦，或迴護七警，究竟香港的既有價值，是否理所當然要去肯定？抑或要怎樣去蕪存菁？