雖然 PSS Sleman 喺印尼總統盃出局，但三戰表現都幾好，面對住三支 Liga 1兼有外援相助嘅球隊都唔駛輸，其中對 Mitra Kukar 一仗曾經領先三球，今年 Liga 2球隊被足協強制要求每隊只可註冊五位二十五歲或以上嘅球員，加上 Liga 2禁援，所以實力非常有限。除咗表現，PSS Sleman 嘅 Ultras 喺印尼總統盃都非常搶鏡，提到 PSS Sleman 嘅 Ultras，「Brigata Curva Sud 1976」非常出名，唔少研究 Ultras文化嘅西方人都認為「1967」嘅水準喺亞洲係頂級計，即使印尼足球冇咩成績，但係都有狂熱 Ultras 為印尼足球爭光。
講起 Ultras，亞洲有好多，不過印尼嘅 Ultras 同大部分亞洲國家最唔同嘅，就係唔止將精神投放喺球場內，唔少成員本身有參與社運，部分有明確政治立場，因此受到唔少政治打壓，某些印尼主流媒體時常將當地 Ultras 組織形容為「無政府主義組織」。而雅加達球隊佩斯查亦分咗幾個 Ultras 組織，大家政見唔同，有組織支持伊斯蘭激進勢力統治印尼，有組織支持宗教平等，到底呢啲事同班 Ultras 有乜關係呢？
答案就係，雅加達唔止足球，好多 Ultras 組織成員來自低下階層，深知社會狀況，身為雅加達足球狂熱者，同時關注雅加達貧富問題、宗教等社會問題，唔得咩？泗水 Ultras 為球隊參賽資格集資上訴兼搞爪哇島環島宣傳理念，組織成員亦強調泗水人唔係軟弱嘅人，仲提起印尼爭取獨立而引發嘅泗水革命戰，形容身為「英雄之城」之子民唔可以向敵人低頭，最後泗水隊自由，當日一班嘲笑泗水 Ultras 自以為英雄嘅人都收皮了。