體育

巴塞靚女熱血球迷專訪:追尋細哨的故事

廣告
巴塞靚女熱血球迷專訪:追尋細哨的故事

廣告

日前細哨光臨香港,有位超級熱情嘅靚女球迷全程追蹤,最終意外收獲同細哨單獨影相簽名拍片,絕對有今生冇來世,佢就係@Barça旅孩嘅Nicole!我地邀請左Nicole訪問呢次球迷奇遇記經歷,同埋鍾情巴塞嘅心路歷程!(Nicole鍾意巴塞嘅原因仲好浪漫架)

波事春秋:從何得知細哨訪港呢?

Nicole:我朋友有份幫手呢個活動,而我亦知道有呢個活動就自己問佢我可唔可以參加,而我都用左傳媒同公關身分去出席呢個活動。

波事春秋:知道消息之後有咩準備?駛唔駛特別請假呢?

Nicole:知道之後都特登上網訂機票過去,我就咁岩放緊兩個星期大假,所以唔使特別請假。係出發之前一晚我都搵下波衫同埋之前係魯營買既紀念品,希望可以俾佢簽到名。

波事春秋:追蹤細哨嘅過程順唔順利呢?中途遇到咩阻滯?

Nicole:都幾順利,第一日中午已經喺媒體見面會見到細哨,另外喺一個細哨同小球迷互動嘅環節已經著左波衫準備俾佢簽名,但太多人圍住埋唔到去,果晚都以為佢第二朝會好早走,下午返到酒店又見到細哨仲擦身而過,但佢仲係工作緊,所以就算喺隔離都唔想打擾佢,淨係拎住支旗俾佢見到。

第二日宣傳活動(簽約儀式),見細哨喺台上有啲悶,所以我就喺台下係咁揮手同俾個6字手勢嘗試同佢互動,細哨都有望到,之後儀式完左離開嘅時候冇估到細哨會行近,於是我就係咁「揚」件波衫,而細哨竟然又真係行過黎簽名!

但最大嘅阻滯就係支簽名筆,因為冇諗到細哨會過黎所以冇搖好,令一開始個簽名好模糊同簽得唔齊(見圖),但佢行過黎一刻我已經超緊張,個心跳到痴左線!然後後面有人將我拉後因為想上前,但因為要拎返件波衫,於是我又好努力咁爬返上前拎返件波衫,拎返雖然見到簽名好朦,但總算簽到啦!

波事春秋:最後終於遇到細哨,見到偶像一刻有咩感覺?細哨係咪好友善?

Nicole:我坐下午機返香港,其實未去到機場已經聽聞佢同我同一班機,但我冇諗過係真,去到機場見到巴塞主席同佢握到手,之後細哨出黎,巴塞主席好nice咁問我想唔想同佢影相呀?但其實我一見到細哨已經捉住佢selfie同攬左佢一下,又同佢傾左兩句兼俾埋剩低嘅波衫、旗同埋精品俾佢簽名,不過巴塞主席又好nice咁問,於是我地就三個一齊影左張合照喇!巴塞主席全家(佢太太同個仔)都好nice架~

之後等出境,細哨咁岩喺正隔離排隊,咁我就facebook開live,點知佢又好配合,又say hi又過黎一齊影一齊笑(見片)!之後我就好似跟蹤狂咁跟住佢地,而細哨就算去左Lounge度坐都同我揮手,佢助手仲過黎拎埋我剩低嘅精品俾佢簽名,令我實在超開心!!

我覺得作為一個巴塞球迷,呢個體驗真係完全無憾!因為細哨簡直任我影任我簽,而我亦聽到香港球迷等到細哨6點幾轉機都影到相簽到名,我都為佢地開心!細哨同佢班crew都好nice,好肯俾你簽名(當然係非工作時候啦!)。

所以回程自費買機票真係好值得,同一班機雖然坐得好遠,但我見到佢上機、沿途又影相拍片簽名仲好close,我都毫不掩飾對佢嘅愛一下攬過去佢都唔介意,實在非常之開心!

之後觀瀾湖巴塞會有足球基地,亦會開個mega store,球迷可以去果度買野都得,不過要睇比賽當然要去魯營啦!

波事春秋:細哨係咪你第一個親身接觸嘅巴塞球星?黎緊有冇計劃繼續追蹤其他球星?有冇追星tips分享下?

Nicole:係呀!其實我前年已經去過魯營,但當時休季冇見到球星。至於追星tips,我覺得唔好喺佢地做緊正經野嘅時候打擾佢,唔好破壞左佢地做野嘅mood,佢地見到你尊重佢,都會好樂意幫你。黎緊如果有巴塞球星黎,而時間地點又夾得岩,我當然會繼續追星啦!

波事春秋:最初點解鍾意巴塞、支持左幾耐呢?

Nicole:我細個鍾意一個男孩子,鍾意睇佢踢波,佢踢波好叻,細個已經代表香港去美國關島比賽,所以我一直cap低佢嘅剪報,去到中學時咁岩見到巴塞,因為佢接受採訪嘅雜誌咁岩巴塞贏歐聯(見圖),咁就開始留意,但其實我係鍾意美斯先鍾意巴塞,因為我係睇國家隊先嘅,而家支持左巴塞4年左右。

我好鍾意巴塞嘅足球精神,佢地會同心協力咁進攻同入波,崇尚無私精神而唔係個人主義獨攬功勞,呢個係我最欣賞巴塞嘅地方。

波事春秋:最鍾意巴塞邊個球員?

Nicole:我最鍾意美斯,可能有人會話:「係人都鍾意美斯架啦」但唔好意思,我真係鍾意美斯! :P

波事春秋:去過幾多次魯營球場朝聖?現場氣氛熱唔熱烈?最鍾意個球場啲咩?

Nicole:我去過魯營一次,黎緊4月會帶睇波團,如果有興趣可以一齊架!魯營現場氣氛好熱烈,我上次去時雖然係休季,但當時個球迷活動展示左三冠王獎盃,所以當日有好多球迷入場玩,好似一個嘉年華咁氣氛都好熱烈。

最鍾意魯營球場夠大,同埋兩層嘅mega store,因為可以瘋狂購物買紀念品!同埋我都鍾意魯營嘅設計、紅藍間隔、同埋球場真係好大!所有巴塞嘅野我都好鍾意!

波事春秋:近排安歷基執教下球隊表現未達最佳,你認為係邊方面問題呢?

Nicole:我覺得每個領隊帶波一定會有高有低,唔會永遠長勝,我覺得唔可以一場比人炒4:0就動搖信心,有邊隊波未俾人炒過4:0呢?皇馬都俾人炒過5:0啦!我唔覺得輸係大件事,因為一定有起有跌。

加上球隊近兩年都換左好多新血,安歷基控制唔晒所有球員嘅狀態都好正常,畢竟安歷基都只係一個人,我好唔希望會發生好似李斯特城炒領隊嘅事,好似另類雲尼亞里事件咁,因為一定會有起有跌,唔可以因為一年半年就炒領隊。

可能係安歷基未即時發揮到新球員嘅所長,要俾啲時間領隊同俾球員互相適應,之後應該會OK嘅!一季半季拎唔到冠軍就話要炒領隊,將責任推晒落領隊度我覺得唔公平,說到尾領隊都係人一個,而且冇挫敗又何來進步呢?

波事春秋:最後一條!你認為次回合巴塞對PSG會幾比幾呢?XD

Nicole:其實我一般都唔鍾意估比數,因為我都有啲燈燈地!所以比數我就唔講喇,只希望巴塞可以入到八強啦!

【編者後記】試問有幾多球迷做到由香港追細哨追到觀瀾湖,又由觀瀾湖追返黎香港呢?單從訪問內容已經感受到Nicole超級愛巴塞同細哨,整個過程準備充足加上熱誠爆燈,最後皇天不負有心人,俾Nicole單獨巧遇偶像細哨,絕對係每個球迷有今生冇來世嘅體驗!而且Nicole對巴塞近期小低潮亦分析得十分理智同客觀,絕對係個冷靜熱情兼備嘅靚女球迷!多謝Nicole接受我地訪問!

廣告