特首選舉，曾俊華率先報名，有評論指係藉此保送胡國興入閘。是耶非耶，只有當事人自知道，但係坊間依然有不少聲音話胡國興入閘會做成「鎅票」，甚至聽聞有民主派選委都係咁講。我當堂嚇一跳，然後得啖笑，講得出咁嘅言論嘅人，可能連特首選舉係點玩都唔多清楚。
《行政長官選舉條例》講得好清楚，特首選舉如果有超過過兩個候選人嘅話，搬完票通常都只會有兩個情況：
一．其中一個候選人得票超過六百票，當選；或者
二．咁多個候選人冇一個得票過六百，咁就篩走晒頭兩個得票最多候選人以外嘅參加者，等兩條友私片，分出高下。（註）
如果講到依度你都仲要問「咁關鎅票咩事」，咁我就唯有畫公仔畫出腸。
要做到傳說中「鎅票」嘅效果，就要有兩個以上候選人係共享同一陣營嘅票源。假設林鄭氏、曾某同胡某都入閘參加特首選舉，而曾胡二人票源相同，咁又係只會有以下兩個情況：
甲．曾胡二人合共得票不及林鄭氏，林鄭氏得六百票以上當選。咁嘅話，其實就算曾胡二人其中一人冇參選，佢地陣營得嘅票都唔會變多，形勢比人弱，就冇贏嘅機會，唔關出幾多個候選人或者咩「鎅票」事；或者
乙．曾胡二人合共得票多過林鄭氏。依個情況下，曾胡二人夾埋會多過六百票，根據《行政長官選舉條例》，得票最低果個就要走人，而如果走人嘅係曾胡其中一人，佢地陣營嘅票晌下一次投票亦都自然會落晒去留低嘅生還者度，即係所謂「鎅票」都係唔會發生。
至於你話會唔會因為胡某參選令到本來投俾曾某嘅票走咗過對面，答案好簡單，建制投票都係「指令」同「利益」兩大原因，曾某箍不實嘅建制票，有冇胡某參選都係箍唔實，至於民主派選委投俾對家，你覺得會有可能發生咩？
同樣道理，安排葉劉氏入閘，亦唔會做到對林鄭氏「鎅票」嘅效果。
至於而家甚至開始有「鎅民望」嘅講法，就更加係痴孖筋。喂阿哥，如果民望可以左右到依個特首選舉，兩年幾前就唔使有咁多香港人瞓街爭取真普選啦。既然民望不能左右大局，咁鎅嚟為乜？
所以，所謂「鎅票」論，都係冇充分理解特首選舉規則下臆想出嚟嘅講法，晌現實情況下根本唔會發生。一般人咁講都猶自可，如果有民主派選委都係有咁嘅諗法，就真係唔該你地讀熟書先去對點使用手上神聖一票發表偉論，唔好犯下啲咁丟架嘅錯誤。
而家資訊發達，要搵資料十分容易，奉勸各位晌評論政治前做下功課了解下先。晌冇充分理解下評論政治都唔係最可怕，最可怕係有人同你講真相，你又不能接受自己柒咗而偏要為咗面子堅持己見錯落去，先係真正嘅可怕。
註：其實仲會有第三第四個情況，只係依兩個情況同「鎅票」冇咩關係，晌度講下：
三．最高得票者得票不過六百票，第二最高票數有超過一位候選人，咁就有最高得票同第二最高得票果堆人再投過，直到投到兩個人出嚟私片為止；以及
四．兩人私片，冇人得票超過六百，冇人當選，選舉程序中止。