政經

葉劉還會發什麼夢?香港人發夢冇咁早!

廣告
葉劉還會發什麼夢?香港人發夢冇咁早!

廣告

雖然有人話佢敢於追夢,始終覺得佢從未間斷在發她的權力夢。今朝特首夢醒,他與香港主流民意,仍然只會是同床異夢。

好難忘記,當年陳方安生還是政務司司長,話公務員要保持政治中立,葉劉藐咀藐舌,話公務員從來都唔係政治中立,亦都唔需要政治中立。之後,終於咪俾董建華搞掂咗嗰個從來不會問責的所謂政治問責制囉。

好難忘記,當年佢話如果唔要求人大釋法,就會有168萬人湧入香港,打開咗人大釋法這一個缺口,仲係唔依基本法規定嘅相關程序添。

好難忘記,當年佢推銷23條,佢對反對意見態度之輕藐。

好難忘記,近呢幾年,佢做咗議員之後,中聯辦講乜佢就講乜,叫佢哋做乜佢就做乜。佢又冇乜自知之明,經常自吹自擂,講埋啲嘢又反智又低智。

更加唔會忘記,佢對人大831政改框架嘅態度。當時佢嘅說法,同今日一比較,可以睇得出這個人是如何前言不對後語,而且真係冇乜原則,冇乜堅持,任何嘢都係睇頭,或者睇自己嘅即時政治利益。

仲記唔記得,政改方案於2015年投票嗰日,等埋發叔事件?事後,佢上電台節目喊住口,話覺得好對唔住(對唔住邊個?);仲話佢哋建制派個個都好乖,跟住仲去中聯辦道歉。

大家又記唔記得,現屆立法會選舉前及後,政府違法玩DQ,佢採取乜嘢立場?

今次參選,幾個月間,佢做咗好多嘢,無疑作出咗努力。但佢係為誰努力?為香港人?大家不妨重溫一下佢講過啲乜。可以睇得出,佢啲邏輯係幾有問題,佢前言繼續不對後語。特別係佢嘅政綱第一稿,擺到明只係想討好北京,幾時有參考香港人嘅意見?幾時有照顧過香港人嘅意願?

大家都唔好忘記,佢點樣自吹自擂,林鄭意向仍未清晰的時候,佢以咩態度低眨其他參選人。大家有冇睇下佢嗰啲酸葡萄言論幾可笑?佢真係憑乜嘢做特首?

佢今日話唔希望見到有梁振英2.0、或梁振英3.0,但梁振英過去五年施政,佢冇份咩?佢唔係行政會議成員咩?有時甚至懷疑,佢是否特登縱容梁振英胡作非為,讓社會撕裂對立加劇,以增加她今次出來參選特首的勝算。有理由推斷,當初佢以為對手係梁振英,才會咁勇,連立法會主席呢個 offer 都拒絕。

今次又入唔到閘,跟住佢會點?真係有覺悟?且拭目以待,樂見佢有轉變。但絕對唔會抱有希望,對這一類咁嘅建制派,根本唔應該有任何昐望。

唔好又比我估中。最壞嘅可能性就係唔使好耐,佢係中聯辦強力動員之下,或者喺下屆政府或中方系統俾個靚位佢,佢可能真係夠膽抓爛難塊,幫林鄭月娥站台。其實有咩出奇啫?以佢咁嘅性格,而且都咁嘅年紀啦,唔通仲望下一屆有機會選,仲有希望做特首咩!梗係會選擇標尾會啦!建制派的理性嘛!

如果冇咁壞嘅估計,即係話佢仲有少少自尊,咁佢都可能未必會做到咁衰相嘅。不過為咗要繼續保持自己嘅政治前途及繼續爭取靚位,咁就好有可能就算不出面撐林鄭,佢仍會暗渡陳倉,加重火力,在未來一個月的特首民意戰中,炮打曾俊華及胡國興,曲線幫林鄭助選,或者曲線幫西環完成任務。一來洗底,二來希望帶罪立功。新政府上台之後,總唔會冇表示嘅!林鄭已經放出橄欖枝,話好敬重佢啦!我相信佢已經收到啦!

至於佢之前講過嘅明白啲人點解要佔中,又話制度有問題,又話1200人嘅選委會好唔妥,諸如此類、諸如此類,好快佢就唔會再講㗎啦。就等於今日佢話知道制度有問題嘅時候,佢唔記得自己曾經講過「選舉就係要篩選㗎啦」、「人大831決定係中央考慮過晒香港嘅情況作出嘅最佳決定」,諸如此類、諸如此類。

但願只是看扁了她,也十分渴望葉劉可以展示她仍有能力脫胎換骨。雖然我知道不應對她們這一類建制派抱有任何不切實際的希望。如果有此一日,我也樂於承認錯誤。

廣告