立即捐款

生活

女朋友真係咁容易嬲? 十萬個激嬲女友的理由:唉。。。

女朋友真係咁容易嬲? 十萬個激嬲女友的理由:唉。。。
廣告

廣告

問:點解會開設「十萬個激嬲女友的理由」?

男版主:一日係連登討論區,睇到有 topic 係「男朋友激嬲女朋友」,好多 comments 都好好笑,有啲覺得講中哂,好有共鳴。

而且自己聽返嚟都有唔少貨。男仔同男仔傾偈,一係講女人;一係講波。而女人一係就明星;一係就自己條女。

你唔會同 friend 講有咩甜蜜,但係鬧交就只可以同 friend 講。

例如男仔鍾意打牌踢波,心諗返工咁耐,踢一日波啫;但女朋友就覺得,返咁多日工冇陪佢,連星期六日都俾埋人地。

男仔可以做嘅嘢,咪互相呻苦同互相勉勵。所以男士會有好多自己同其他人嘅案例。我見不論男女都有同感,覺得有得搞。

***

問:你地點分工?

女版主:最初係佢偷偷地開依個 page,開左一個月我先知道。跟住我先幫手睇投稿,俾意見。

男版主:一來只係無聊,二來係驚柒,如果冇人 like 咪好樣衰,俾多樣嘢佢笑。
問:發現男友開左個咁嘅 page,有咩反應?

女版主:我冇嬲嘅。。。只係睇番邊啲 posts 關自己事,原來有兩三張係自己。

男版主:累積到而家差唔多有過千投稿。我地會揀啲好笑,有共鳴嘅出嚟。

***

問:第一次搞 page 就咁成功,有咩感受?

男版主:係有啲驚喜。因為第一次,所有嘢都邊試邊學,試過有讀者 inbox 我地,建議改設定,我地先知有呢啲功能。因為咁識到一班讀者同投稿人,互相交流經歷。

我地好鍾意睇 ViuTV 嘅《衝三小》,好開心佢地係 IG like 左我地個 page;亦好開心游學修都 share 我地嘅 posts,平時係我地睇佢地架嘛。我地都鍾意依類鍾意鳩 up 嘅藝人。

***

問:你地點樣認識?

女版主:我地讀高級文憑時係同班同學,玩埋一齊。讀大學時唔同科,但都係理大。

男版主:當年仲係 MSN 年代,仲有「等佢 online」, 「online 扮 offline」等嘢玩,直到見證佢收皮。

***

問:有冇被激嬲嘅切身例子?

女版主:例如影相冇數 123。。。

男版主:女仔要放相到 IG 呃 like。但我唔識影相,構圖奇奇怪怪,影得佢矮,影得佢肥。。。

仲有我鍾意睇戲,網上啲配圖都係我整。我會拉埋佢睇新戲,但有時我鍾意嘅戲佢未必鍾意。例如講金融嘅《沽注一擲》,入場前以為係《華爾街狼人》之類,入到去先知原來好多理論,佢好冇癮,我望到佢就知瀨嘢。

***

問:平均會嬲幾耐?

女版主:短就兩三個鐘,多則一晚。

男版主:我地比較獨特。有啲情侶強調約法三章,嗌交要係瞓覺前搞掂。我地都希望咁,但好明顯做唔到。

佢火遮眼時講咩都會 ban 你,但佢瞓完覺心情就會好返。

女版主:瞓醒會唔記得自己嬲咩。。。佢反而會記得,因為對佢嚟講好無理。

男版主:但對佢嚟講就好 make sense。

***

問:好多女朋友嬲嘅笑話,都係女仔口不對心。係咪真嘅呢?

女版主:係架,大部份都係咁。話唔駛接佢放工,心底又想佢接;話唔駛特登送禮物,唔送又會嬲。收到好多投稿都係依啲 cases。
***
問:點解嬲嘅都係女朋友?男朋友會唔會嬲?又嬲啲乜嘢?

男版主:都有女仔投稿話男嬲女。但男仔會嬲啲乜,真係答你唔到。。。

女版主:因為就算係男朋友嬲左,最後都會變左女嬲番轉頭。所以男仔覺得嬲嚟冇用,索性唔嬲。

男版主:依個 page 有咁多共鳴,就係因為女嬲男居多。因為男朋友都知道,嬲女朋友冇好結果。

問:唔唔。。。

***

問:女朋友嬲時,要點樣氹返對方?

男版主:我唔識答。。。

女版主:佢都唔識,所以答唔到。已經四年,火遮眼時好難下到啖氣,仲未搵到解決辦法。

男版主:大家嘻嘻哈哈嘅時候,佢話過「你試吓我嬲嗰陣咁氹番我」,不過嚟真嗰時完全唔 work。。。

其實都係雞毛蒜皮嘅事,主要睇佢嗰刻心情。唔理幾小事,撞正佢 M 到,加上自己忟忟地,就可以引發大災難。睇戲嗰件事就搞左一兩日。

唯一可以做嘅,就係佢未到最嬲嘅時候,要醒少少即刻耍冧。嗰時候男仔都會火火地,加多幾句就會火上加油。如果連自己都發脾氣,結果只會更加慘。

***

問:究竟情侶應該點樣相處?你地有冇經驗之談?

女版主:鬧交少不免,但不外乎遷就和容忍,忍唔係委屈,而係值得。如果一方始終覺得委屈,即係出現問題。嬲完大家要解釋番,對雙方都有好處。

男版主:將心比己。無論男女,㷫嗰時都諗唔到對方,覺得自己大哂。就算你明知係條女忟,好無聊,都要嘗試從對方角度諗。

試吓喇,雖然冇可能做到。。。

***

十萬個激嬲女友的理由

***

後記:

是次訪問令筆者大開眼界,因為內容根本意想不到,完全超乎想象。

訪問後不免感到惶恐。點解愛情會咁麻煩?又何必要妒忌呢?

有同感嘅一齊唱!「原來沒有,從來都沒有。。。」

廣告