攝：Alex Leung
題為編輯所擬
趁大家仲會狙擊我嘅時候，想講下整個參選選委嘅感想。我特別希望讚我投白票嘅人會睇下，因為我有好多嘢想同你哋講。
1. 目的
我真心唔係為原則而去選嘅。話想選嘅時候已經有覺悟要投個自己唔太鍾意嘅人。我希望第一樣做到嘅係合作，一個關於傘兵同傳統泛民嘅合作。結果我唔知點評價，泛民支持者應該好憎我，但如果IT Vision 嘅人無呃我嘅話，我相信佢哋理解我嘅決定。
第二個目的係689 下台，選嘅時候其實無乜信心，因為始終呢個係一個高度操控嘅選舉。叫成功咗一半，失敗咗一半。第三係行動。我唔想做一個企喺道德高地乜都唔做，但去四圍指責點解唔咁咁咁做嘅人。而我相信，你要勸人同你一齊做，你首先要自己行出第一步。
第四係話語權。由拆大台、反退聯等等嘅事開始，我成日都問"點解會變成咁"。點解永遠嘈嚟嘈去都係自己人，點解我哋無耐性去接受同理解下其他人嘅方法？
好多人話我講嘢兜圈講唔定個立場，但其實係因為好多嘢係無衝突 -
lesser evil 即係秋香效應，唔應該係一個好難明嘅概念；
但all in JT 之餘，有空間俾人搞下公民提名咪由佢做囉；
但all in JT 之餘，有個胡官講下人話咪俾佢入去講囉；
我無水晶球話我嘅睇法一定啱，相信大家都無。所以大家可唔可以喺唔影響自己立場下，盡量包容下其他人嘅睇法，其他人嘅行動？呢個係我呢兩年一直想帶出嚟嘅訊息。
2. 選擇
最後我投果票，其實無關原則，因為我一早有覺悟要放棄原則；亦都無關策略，因為最後果日大家其實都好清楚功敗垂成。
我考慮嘅係，我應該選擇企喺投JT 果邊幫白票講說話，定係企白票果邊幫民主300+ 講說話。而我選擇咗後者。
因為唔想投JT 嘅人，喺整個選舉入面，一直俾人忽略，一直俾人攻擊。而我好想話俾佢哋知，其實就算係民主300+ 入面，都有唔少人同佢哋有相同諗法，只係迫於形勢而投JT。
無論你有無企過龍和道，民主300+ 入面好多人都無忘記過你哋。只係策略上要令建制選委覺得JT 有得贏，就要刻意淡化其他聲音。無論你覺得呢個策略好唔好都好，實際上我哋又真係諗唔出其他辦法，我哋諗唔到點衝，點解要阻止其他人嘗試衝呢？
請相信好多人投果時其實都好掙扎，特別係做過救護站嘅醫生護士。請尊重佢哋嘅勇氣，而唔係冷嘲熱諷。
3. 攻擊
無論我哋點互相攻擊都好，中共嘅控制唔會停止嘅。或者我哋要諗清楚，我哋嘅真正敵人係邊個。你幾憎我，我幾萬箭穿心都好，我都會繼續帶出我嘅理念，直至用盡所有能量為止。如果相信呢種理念嘅，希望大家可以放低冷嘲熱諷，放低怨恨，一齊面對返我哋真正嘅敵人。
一朝起身，新一輪清算又開始。
願天祐香港