以前退聯公投因為兩成聯署DQ咗搞唔成，已經好多人覺得中大既核實程序太嚴苛。今日班選委諗出一個名為核實、實為考核既審查程序，令門檻三級跳，你一背唔出啲議案detail，就收你皮。公投章則上只係要求八百個聯署，依家收集到一個double，成千六個聯署，都可能搞唔成，咁中大以後仲有咩可能搞到全民公投？
我諗起上陳健民堂，佢話以前美國黑人有投票權，但係種族歧視強既南部州份，往往會用考試既形式阻住黑人投票，問你一堆detail野，答唔出就收皮。依家既做法有咩唔同？咪都係用行政程序取消你既投票權。唯一唔同既係，個時只係得黑人冇得投，依家全中大同學都冇得投，係一個無差別既打壓。
一開頭，無理提高門檻，瘋狂DQ哂同學既聯署。然後，係代表會度提出所謂「司法覆核」，馬上有司委會出「禁制令」停咗成個核實程序。
司法覆核係香港市民少數可以用制度去挑戰政府暴政既武器，係中大，竟然變成一個俾建制用黎踐踏民主既維穩工具。禁制令？呢個詞用得岩啊，碼頭罷工個時我見過，雨傘運動個時我見過，都係用司法之名對付抗爭者既老土招數。成個情況，根本係有一班人無所不用其極，意圖消滅呢個全民公投，保住周竪峰潘智鍵兩個人既權位！
講到尾，佢地只係心虛。如果佢地真係堅信自己冇錯，唔值得罷免，點解唔光明正大同發起公投既同學辯論？如果，公投結果係同學反對呢個議案，佢地咪還得清白，從此有公信力執政囉。但係，佢地心知理虧，心知一旦所有細節呈現俾全中大同學討論、判斷，只要有充分時間投票，佢地一定要面臨應得既懲罰。
但我地作為無權無勢既普通同學，吹得佢脹咩？佢地用盡一切程序，拖到考試，拖到暑假，迫到你搞唔成公投，又奈佢如何？我只可以話，希望所有中大同學至少要記住一個結論，係呢個睇落去咁乾淨既校園度，已經滋長出一個盤踞建制、戀棧權力既官僚毒瘤。佢地係呢個得來不易既校園民主既敵人。