印尼總統呢2日到港搞到鬼咁隆重，不過我就比較留意喺亞博會幫Jokowi造勢嘅Slank，呢隊Blues rock樂隊喺印尼樂壇地位非常高，被認為係國寶級樂隊之一，除咗活躍樂壇，近年亦多次表態支持Jokowi，甚至公開支持Jokowi頭馬，之前選雅加達特區首長失敗嘅華人鍾萬學，被認為係吹Jokowi派，而本身聽開Metal嘅Jokowi都好識做，雖然Slank唔係玩Metal，但經常讚Slank係一隊印尼頂級樂隊，出去平民飛髮鋪飛髮都要求店主播Slank啲歌，大家互相吹奏，明眼人都知咩事，Jokowi需要有影響力嘅人喺身邊， Slank亦需要尋找音樂以外嘅出路。
除咗Metal，Jokowi亦好關心印尼足運，總統盃都係佢提議搞，而Jokowi粉Slank其實同印尼足球都有好多關係，首先幾年前嘅印尼超聯（ISL）歌曲都係Slank創作，而部分成員更係球隊班主，現時參加印乙嘅Celebest FC班主就係Slank結他手Abdee Negara，鼓手Bimo亦參與過賽會管理工作。
不過Slank為印尼超聯創作嘅歌曲迴響一般，反而球場內球迷經常唱嘅Slank作品都唔係同足球有關而係情歌，而且都係舊作，例如一首pop rock歌曲'' Ku Tak Bisa''，歌詞同足球亳無關係，不過嗰段鋼琴前奏響起大家都識唱。