文： 法律界基層工人 - Charles
基層工人先利申︰家住九龍灣，姦劫事發地點放工跑步經過唔知幾多百次，話唔擔心唔想色魔落網，假嘅。到而家事情發展到，疑犯被捕後唔到一日，竟然在沒有閉路電視的秀茂坪警署羈留室自殺身亡，工具就懷疑是一條電腦線。故事下半部的確離奇到唔知點畀反應，暫時就要靠死因庭根據法例展開研訊，查明疑犯死亡事件的來龍去脈。
基層工人一向係程序撚，冇本事做福爾摩斯更加唔鍾意陰謀論，所以只可以提供少少悶蛋角度，幫助讀者諗多啲啲咁解。基層工人想大家試下從呢個角度諗︰如果冇自殺事件，件事會點樣進行落去？
回一回帶去返尋日清晨先︰警察在寶達邨拘捕疑犯（唔係佢居住的秀茂坪邨），再押返佢住所搜查，帶走左一啲證物，包括幾部電話、以及一啲衣物。現場接受訪問嘅案件主管（OC Case），係東九龍總區重案組的督察級人員。總區重案組辦公地點唔係秀茂坪警署，而係在慈雲山。一般來講，警方要在四十八小時內，決定開案定畀佢保釋；如果開案，就要安排去裁判法院提堂。
由於係強姦案，警方開案再 pass 畀律政司，一般會申請押後案件，準備申請交付高院審訊（committal）。根據《裁判官條例》，被告有權向裁判官申請先召開初級偵訊（preliminary inquiry），甚至要求傳召證人（包括受害人）作供。控方一般好唔想有呢種玩法，因為咁就等同要受害人提早在法庭程序畀多次口供，到正審時又再講多次。所以，控方一般會寧可等到證據比較完備的時候，才提出交付高院的申請，減低被告在交付過程時「出招」的機會。另一方面，控方亦需要把握時間，盡快蒐集齊全所需要的證據，因為就算裁判官在第一堂批准押後，亦唔可以期望到第二堂、第三堂，裁判官會接受「等緊份 DNA 報告」、「控方證人未認人」等等理由而不斷押後落去。
換言之，在警、檢而言，係有幾大的時間壓力，要盡快「砌夠料」的。
以媒體資料所見，總區重案組暫時掌握到、足以將疑犯同姦劫案聯結起來的，係疑犯用過受害人的提款卡，以及住所搜到懷疑屬於受害人的電話。記住，刑事舉證的標準係「無合理疑點（beyond reasonable doubt）」；未有任何進一步將疑犯同強姦案現場連繫的證據，單憑疑犯用過、管有受害人物品呢點，係唔夠的。DNA、衣服纖維 …… 讀者們睇美式犯罪劇應該唔少，都知道呢啲係基本所需。憑住總區重案組而家手上有的資料，要申請押後進一步調查兼唔准保釋，唔難；但如果冇進展，就好難提出到交付審訊申請。
於是，除左物證，又要返返去刑事蒐證另一個基本環節︰審疑犯，問口供。程序上，秀茂坪拉到人，需要去就近警署由值日官 (DO) 接收，也就是秀茂坪警署。另一方面，從報道所見，秀茂坪警區的重案組，亦曾經參與調查。所以，秀茂坪警區同疑犯的關係，除左係「收犯」同羈留地，亦可能係參與調查的單位所在，包括有份盤查疑犯、錄取可作呈堂的警誡下供詞。
而家呢個階段，警察連控罪書都未簽得落手，即是連調查工作都未完成，更莫講話要準備開案。除左羈留監視機制有冇漏洞、疑犯用咩工具自殺等問題疑點重重，可能同樣要關注嘅係，所有職務上需要（或有權）接觸疑犯的單位，包括東九龍總區重案組、秀茂坪警區重案組，以及秀茂坪的報案室（特別係值日官），究竟喺呢不足三十小時內，做過乜？或者做漏乜？
除左深究「點解落到手自殺」，我地更加要問，「疑犯為咩要自殺」？要令一個據稱「案底纍纍」但體格健碩的癮君子花如此大力氣自尋短見，幾可肯定，曾經有超越一般常態警務調查或羈留程序的事情發生過，警方、法庭，必須深究，有冇警務人員要為此負責。