政經

300幾億買一個體育夢?財政預算案有關啟德體育園的發言

廣告
300幾億買一個體育夢?財政預算案有關啟德體育園的發言

廣告

按:財務委員會工務小組正審議香港史上最大規模、耗資300多億的體育設施群──啟德體育園。各派議員對於招標模式、應該由政府還是私人管理、五萬人主場館的必要性、對落選投標公司支付六千萬等問題展開了討論,朱凱廸利用財政預算案的修正案辯論,將對啟德體育園的思考綜合了一次。立此存照,希望有助於日後的討論。

本人想討論的,係57及58號,鄺俊宇議員同埋張超雄議員既修正案。兩條修正案內容係一樣的,即,議決為削減分目 000 而將總目 53 削減 895,000 元。(削減大約相當於民政事務局局長 3 個月薪酬預算開支)。

我係兩周前討論民政事務總署既發言裡面,已經提到過我對民政局一啲睇法,今天或者可以集中睇下民政局係體育方面既工作。

我地不如重溫下一啲好典型既「香港故事」先。

我地聽過足球員蘇來強係十幾年前只得六千蚊人工,同時兼職消防員既古仔,又聽過18歲曾經做過最佳青年球員既姚學文,24歲時一度掛靴,轉職消防員既古仔。

但其實過左咁多年,情況仍然係有待改善。港甲變左港超係好左,底層球員會8500至11000蚊,但港超聯理文流浪既行政總監馮嘉奇,上個月接受訪問時提到,而家仍然有青年球員,家住天水圍而月入四千。

好啦,足球圈可能太多人,唔夠「精英」。

最近港台有個節目,《鏗鏘集》既「運動場上」,訪問左好多唔同界別唔同項目既運動員,我地又睇到對本港體育設施既分析。

曾經得過亞運冠軍的山地單車手陳振興,提到越野單車的山徑是由單車運動員拼手胝足咁去維修同埋開鑿,搞一條要幾星期。

射箭運動員李嘉威提到牛池灣射箭場,草地水平係好斜,好難做訓練,甚至長期會有受傷風險。

剛剛跳出1米88佳績,打破香港紀錄,躍升世界排名第9既楊文蔚就指出,目前除左灣仔運動場外,唯一符合國際田聯標準既田徑場地,將軍澳運動場在設計上亦有唔小問題,例如坑渠蓋既質料錯左,跳高墊亦的助跑範圍亦不足圓周20半的規定。

咁政府做左咩呢?

我地留意到政府好識玩,搞個「體育專員」出黎,其實係將民政局本身負責體育政策既副秘楊德強,俾多個新名目佢。另外仲有70億既精英運動員發展基金,後來又再多10億,咁當然係好左,但其實見到體院既收入大概亦只係多左1億多小小。

相對之下,我地既政府係啟德體育園既319億支出,就大得驚人。

但其實呢319億,並唔係直接拎去資助體育事業或前線運動員。

特別係5萬座位既主場館,功能同政府大球場幾乎完全重疊,長毛話齋,「無啦啦整撻啦」。

我要補充既係,體育園中的公眾田徑場我係贊成的,室內體育館雖然有質疑,但或者相對之下,尚算可以接受。

但呢個無啦啦的主場館,相信係佔左過半既開支,即係百幾二百億。

有左呢百幾二百億之後,多左啲咩呢?最主要係多左個上蓋,咁可以做埋concert。但真係對體育界既投入,並唔係最直接。

同埋,我地發現到,原來,立法會工務小組,對啟德體育園主要的爭議,都係在於個模式,即係個 有冇辦法確保個contractor,令項目回到本,或至少有番啲收入。而唔係任何體育上的指標。

其實我覺得,關於啟德體育園。DBO(Design-Build-Operate)固然係爭議點,因為真係好少見,政府又出雞又出豉油,仲要1.8億既「提案誘因撥款」,俾啲輸左的 bidder 有安慰獎。

但或者DBO只係其中一個環節,不是最大的關鍵,最大的關鍵係體育文化或政策目標的推動,係不應由牟利為本的設施管理者去肩負責任的,而係應該由政府承擔的,否則就會俾商業、餐飲、零售、地產去主導。

設施管理者主要係應該做好 professional 的部分。

即係剛才講到,陳振興、李嘉威、楊文蔚關心果啲部分,點樣可以做到運動員真係想要的運動場。要好多Details 和心機,我相信體育專員係有可能做得到的。
咁而家點解係咁呢?

一就係因為成本太高了,319億,高到要回本,所以竟然有60萬呎零售及餐飲,令個體育項目變左地產項目。秘書長馮太同體育專員,變左旅遊專員,地產專員,要兼顧好多根本唔需要考慮的事。

二來是政府冇信心到一個點,因為民政局局長不關心體育,大球場又搞到一住屎。

至於個局本身吹水的目標,盛事化的盛事,本身就已行錯了標準——例如一個外國城巿去host 奧運,去host 世界盃,係因為想用體育文化資本去 translate 出商機,upgrade 或 consolidate 旅遊的 branding,也因為對內管治有提振民情作用。

至於對 sportslover 來說,氣氛好只是 bonus,舉辦盛事係 once a lifetime 的機會,贏或提升戰績的機會。

以上呢幾點對香港唔算太關事。

但我地本身有咩體育文化資本?LOL

不如做好體育好過啦。

任何關心體育的人都明白,香港根本不需要盛事化,皇馬來港踢到17-0也無意義,四隊英超來港對方也不會出真力,只會係平日比賽力量的十分之一,人地當係旅行,見下FAN屎簽個名,吸下戲金。

香港的體育文化問題,主要係沒有經濟鏈,只能主要靠資助,咁資助一定有遺漏,照顧唔到好多俾心機既運動員。

與其搞大白象,倒不如執靚現有的不同體育設施管理,再擺舊錢係度,諗下點資助多啲前線運動員,做好啲體育教育好過啦。

至於民政局局長,劉江華先生,實在難以評價。印象中,我未見過佢黎立法會傾體育政策事宜,幾次啟德體育園既討論,都係秘書長馮太同埋楊德強先生孤軍作戰。

既然,局長冇政治承擔,咁不如人工俾埋啲幫佢頂既公務員啦。

運房局又係呀,張炳良局長,橫洲村民等左你500日,你又派房署啲官幫你頂。你同劉江華先生一樣,不如退番啲人工俾政府啦。

本人謹此陳辭。

廣告