體育

【印尼足球奇聞】泗水隊與球迷的故事

廣告
【印尼足球奇聞】泗水隊與球迷的故事

廣告

早排講完Arema(阿雷馬)因為印尼聯賽閙雙胞而產生兩支阿雷馬,最後居然搞到原會被停牌嘅奇聞,現時順手講埋另一支遭遇相近嘅球隊,呢隊波名叫Persebaya Surabaya,一支東爪哇省Surabaya(泗水)市職業足球隊,印尼華人常稱為泗水隊,同阿雷馬一樣都係東爪哇省有龐大影響力嘅球隊,呢支球隊喺1927年正式成立,曾經係一支擁有唔少華人足球員嘅球隊,上世紀曾經係印尼足壇勁旅,但曾經幾次不認真作賽被罰停牌,但無阻球迷對球隊嘅支持。而支持泗水隊嘅球迷被通稱為Bonek,過往有唔少暴力事件與Bonek有關,傳統宿敵係阿雷馬球迷''Aremania'',雙方球迷長期對立,印尼球迷引發嘅暴力衝突部分都同Aremania及Bonek惡鬥有關。

1994年PSSI(印尼足協)將兩個存並嘅印尼聯賽Perserikatan及Galatama合二為一,新頂級聯賽叫Liga Indonesia Premier Division(印尼首要聯賽),泗水隊曾經奪得96–97賽季冠軍,之後要等到2004年先重奪冠軍,2005年代表印尼參加亞冠但無法出線,去到07-08賽季印尼首要聯賽變成最後一屆,因為排名問題泗水隊無法參加08-09賽季新成立嘅Indonesia Super League(印尼超級聯賽),但球隊喺變成次級嘅08-09印尼首要聯賽賽季都能夠奪得09-10升上印尼超級聯賽參賽資格。

好可惜泗水隊喺2009-10超級聯賽(ISL)賽季成積差劣最終排尾二要降班,不過2010年另一個同印尼足協冇關係及不許可嘅新職業足球聯賽Liga Primer Indonesia(LPI)成立,泗水隊就決定過檔去LPI並將球隊由Persebaya Surabaya改稱為Persebaya 1927(以下將會簡稱1927),而為免被PSSI(印尼足協)停牌,球隊管理者收購其中一支次級聯賽Liga Indonesia Premier Division嘅球隊買殼變身做另一支Persebaya Surabaya繼續參加印尼足協PSSI舉辦嘅次級聯賽,即係話當時Persebaya Surabaya已分兩隊,主力隊1927踢非官方嘅LPI,而次要隊繼續踢印尼足協管理嘅印尼首要聯賽。

當時大部分球迷都追隨過檔非官方聯賽嘅1927,因為大部分球迷認為1927係唯一能代表泗水嘅足球隊,而另一支參加印尼足協PSSI次級聯賽嘅泗水隊只係因為唔想被停牌而買殼成立,屬影子隊,所以踢非官方聯賽嘅1927每次主場賽事看台反而塞到水洩不通,而踢官方聯賽嘅泗水隊主場看台就經常出現空位。

LPI結束1927奪得冠軍,而支持LPI一方嘅勢力亦入主印尼足協,LPI成為印尼官方聯賽,2011-12賽季LPI改名為Indonesian Premier League(IPL),但另一股對立勢力掘起成立咗另一個聯賽及足協,由於形勢唔明朗一定要保持兩個會嘅參賽權,1927就參加IPL,另一支影子隊就參加另一對立勢力成立嘅次級聯賽,而最後1927就喺IPL屈居亞軍,另一支影子隊就喺Second round出局。

去到2013年LPI一方勢力被舊派人士擊退趕走,舊派人士重掌大權後宣佈下季唔容許球隊一分為二,唔承認參加IPL嘅1927,反而承認另一支買殼而成嘅泗水隊,甚至去到地方法院都判1927唔合法,最後原會被停牌,反而另一支買殼而成嘅泗水隊就成為官方合法球隊,仲取得2014年升班資格。

對於遭遇相近嘅阿雷馬球迷而言,即使原會被停牌,但另一支幾年前新成立嘅阿雷馬依然存活,阿雷馬精神依然不死,原會與否唔重要,但泗水球迷''Bonek''態度就完全唔同,佢哋認為泗水隊永遠只有一支,就係1927年成立嗰支,而拒絕承認2011年成立嗰支影子隊,所以發起多次爭取真.泗水隊行動,例如罷睇,遊行,透過法律途徑爭取等,齊心抵制下2011年成立嗰支影子泗水隊入場人數一次比一次少,令球隊管理層非常尷尬,其後球隊改過幾次名嘗試迎合球迷但都失敗,最終因為嚴重蝕錢要同警察隊合併,今年正式搬離泗水市,而法院上年宣判承認原會合法性,今年初印尼足協正式將原會復牌,現時正在征戰乙組聯賽,結局就係Bonek嘅堅持取得勝利。

Bonek經常被主流媒體素造為只會打打殺殺嘅一群流氓,但泗水隊分裂事件中可見Bonek對球隊嘅忠誠有幾強。

廣告