就冇幾耐之前，我有一個喺台灣工作時認識嘅朋友text我，佢話要寫一篇嘢宣傳花蓮旅遊，係畀香港人睇嘅，「想私下請你幫我看看，我的用語香港人是否看得懂」
果篇嘢我全部睇得明，不過有部份字眼就的確唔係香港人用開嘅。例如「歐式的城堡」，香港人通常講歐洲式或者歐陸式。
係嘅，雖然都係中文，但係台灣嘅中文、大陸嘅中文、香港嘅中文，係有明顯嘅分別，無得扮嘅。
最近有首由香港新華社推出嘅廣東話rap歌，歌頌下一國兩制、國家對我地幾咁有恩，先唔講裡面嘅內容同意識，但裡面嘅「廣東話」，其實一聽就知唔係香港人寫嘅。
「觸碰到我嘅知識盲區啦」
「注意老師而家我劃重點」
「入心入腦拓闊知識層面」
「載滿底氣作為內心依歸」
「無論飛機郵輪全世界到處跑」
「行上一帶一路嘅快車道」
好喇，夠喇。成首rap都係廣東話，但係有邊句係真係似出自香港人個口？
我肯定，呢首Rap，唔係香港人寫，可能係住喺廣東省嘅大陸人，甚至只係識廣東話嘅北方佬寫。
語言，作為一種溝通工具，係好地道嘅文化，通常要住喺果個地方一段日子，先可以講到流俐嘅本土話，如果要做到同本地人同化，隨時要花二三十年。
中共不停咁希望透過愛國教育，灌輸愛國愛黨嘅信息俾香港下一代，又希望透過普教中，消滅地道嘅廣東話語言文化，暫時未算好得逞，不過佢地亦都學醒咗，你地咁怕普通話？我就用返你地嘅語言文化，同你地洗腦，好似上面所講嘅rap歌就係一例，另外，西隧入口迎接習帝果幅紅banner，就係用繁體字，「香港與祖國同命運 紫荊與國旗相映輝」，個個字你都明，但一加埋就狗屁不通。
雖然暫時呢種扮地道嘅政治宣傳手法好鬼生硬，露晒底底，不過香港人一定唔可以掉以輕心，要繼續睇到實一實。
*呢篇嘢我係專登用廣東話寫