20/8 聲援政治犯遊行（一）
戴耀廷：我認同公民抗命，就要實踐，不想坐在冷氣房指指點點
「我以前都鍾意咁做。咁樣最安全，贏取最多掌聲。」
＊ ＊ ＊
記者連番包圍戴耀廷，問的都是同一件事。
「我仍然好堅定相信，司法獨立仍然存在。三位法官都係基於對法律嘅獨立理解判案。只不過終審法院首席大法官馬道立講過，法律條文背後有法律精神，有公平公義，尊重市民尊嚴。三位法官似乎未全面體現到。」
「作為法律專業，就係要了解法官裁決嘅理據，提出意見。批評完全冇問題，但如果將法官裁決同佢個人生活扯上關係，咁就唔好，會損害公眾對司法嘅信心。」
「我會好清楚講，我唔同意上訴庭法官一啲觀點，未能充分顧及公民權利和公民抗命。但我唔會指罵任何法官受任何政治影響。」
＊ ＊ ＊
他回應石永泰種種批評。
「我已經自首，亦將會受審。如果起訴我地嘅係非法集結，我地一定會承認。但而家起訴我地嘅係相當空泛嘅罪行，公眾妨擾。我擔心原來空泛嘅罪行，被政府用嚟打壓異見，變成內地嘅尋釁滋事罪，咁就唔只係個人得失，必須要抗辯。」
「一個學者當然可以好舒服匿係辦公室，左摑一巴，右摑一巴，你又唔啱，佢又唔啱，我最聰明我最啱－－其實我以前都鍾意咁做。咁樣最安全，贏取最多掌聲。」
「但作為一個學者，我唔想知識停留喺象牙塔。我想真係用到知識，推動社會進步。我唔想坐喺冷氣房冷眼旁觀：『你地都唔係好啱』。」
戴謂自己沒有創意，所有公民抗命的概念都「抄襲」自馬丁路德金。當年他亦受過同樣指責：希望秉持非暴力抗爭，但最終衍生暴力衝突＊。
「你話我書生論政、角色衝突，冇問題。我只係按住自己良心，實踐作為學者應該要做嘅事。」
（註：據《伯明翰監獄來鴻》，馬丁路德金這樣回應批評：「假如這非暴力哲學至今未誕生，那麽我肯定此刻南方許多街道已血流成河。而且我更確信，假如我們的白人弟兄把我們斥爲「暴民煽動者」和「外來鼓動家」。。。拒絕支持我們的非暴力鬥爭，那麽數以百計的黑人出於沮喪和絕望，將從黑人民族主義思想中獲取安慰和保護，這一發展趨勢不可避免會導致恐怖的種族對抗惡夢。」）
＊ ＊ ＊
圖二
有市民贈送囚衣予戴耀廷，他笑著接受。「都預左喇，下年應該喺監獄入面。既然年輕人已經付出左，我都要有準備。」
題為編輯所擬