媒體

《東張西望》:最啱只識搵錢但冇乜道德價值嗰群target audiences

廣告
《東張西望》:最啱只識搵錢但冇乜道德價值嗰群target audiences

廣告

據報,無綫《東張西望》報道油麻地夫妻墮樓案時,不單以「凶宅」角度剖析案件對樓價的影響,兩位節目主持人更為觀眾送上投資貼士,形容不少人都視凶宅為商機。

正所謂有危便有機,有人死就有商機,凶宅有價有市,投資前景理想,但市場欠缺全面的凶宅資訊,故此實為媒體莫大商機。如果我係CCTVB高層,唔使多講,立即推出一連串凶宅節目,保證明年業績報告唔使蝕。

- 推出Dead Dead Channel,中文「凶機台」,搵隻紙紮馬騮做ICON。由凶機台每周發放「凶源樓價指數」,彌補中原樓價指數的缺陷,為你緊貼凶宅市況,讓觀眾捕捉商機。

- 凶張商望:由皇牌節目「東張西望」原班人馬粉墨登場,以最娛樂性手法報道凶盤帶嚟嘅商機,Patrick sir嘅凶宅專家朋友會以顧問身份,為觀眾講解如何捉緊投資凶機。節目更會邀請出爐港姐為你主持「凶宅睇真啲」,帶你直擊凶宅有幾抵買,回報有幾多。而為了鎮攝惡魂,港姐會由Do姐一人兩票選出似佢嘅佳麗,保證殺氣十足。

- 香港邪則:驗陽宅要搵詹SIR,驗凶宅梗係要搵玲玲姐。玲玲姐為你驗一驗凶宅究竟「有幾凶」,睇吓凶案有冇發水成份,從而研究凶宅究竟抵唔抵買。玲玲姐更會教你如何為凶宅裝修,佈風水陣,保證你凶宅變豪宅,年年破頂做樓皇。

- 植入式廣告:以後劇集要拍殺人戲,即搵現成凶宅實景拍攝,殺人犯必定追住個死者走勻全屋,保證觀眾將內櫳睇得一清二楚,變相睇樓,幫業主做埋植入式廣告。

- 樓市喜訊:第一時間報道凶宅出爐。「又有人死啦,又有人自殺啦,又有單位有凶案啦,商機呀,今次係五屍命案,樓價起碼跌六成,仲唔快啲嚟睇盤?」

- 贏在殺人前:設立潛在凶案犯與凶宅買家配對庫,如果你有殺人或自殺念頭,立即登記配對庫,買家可以喺凶案發生前睇定個盤。大台仲會幫你做「凶宅逆按揭」,如果你係業主,有將單位變成凶宅嘅念頭,可優先賣畀大台,大台等你走咗之後會燒番幾十億畀你喺下面過世。

- 凶盤傳僧,除咗為你送上凶宅最新資訊,仲會附送僧人誦經服務,全部僧人保證大陸來港,真假難辨,符合國情。

呢啲節目,最啱只識搵錢但冇乜道德價值嗰群target audiences,通常呢種人都大把錢㗎,掃你幾個凶宅畀CASH又點話。你覺得咁樣做好陰騭?驚有報應?如果可以放下迷信,理性分析,便知道這是一個大商機。可惜我做唔到CCTVB高層(相信要通過品格審查,品格善良難以通過),唔係嘅話,呢鋪一定係「成名作」。

題為編輯所擬

廣告