立即捐款

陳劍青

本土研究社成員,經營民間地理思想,關注城市空間問題。 網誌

規劃

「貨櫃屋邨」解決劏房問題?

「貨櫃屋邨」解決劏房問題?
廣告

廣告

興建「貨櫃屋邨」既點子民間團體已經講左幾年,我地都有份講,原因係依家香港既房屋問題已經係人道災難級數,起番臨時房屋係應有之義。

我地以往既提議,尤其係針對點樣利用政府上千公頃既閒置地同短租地,而唔係俾啲富豪做後花園依家釋放番出黎做貨櫃屋邨,由一開始講個陣大家都覺得係天馬行空,到依家政府都要話開始做,所以唔好話民間研究/倡議冇用,只不過唔知佢係真心攪定係純粹食左個概念攪黎做樣。

興建貨櫃屋邨,個關鍵唔係在於咩「多元化」同當做慈善,而係貨櫃屋本身可以「多快好省」咁用到啲閒置地起到一定既房屋供應量平租俾基層,能夠成為一道打破本身劏房租金瘋狂價格既政策工具,令到私人租住市場回復合理水平。

當一塊500呎既土地範圍可以起到6層150呎貨櫃屋,其實只係需要搵到77公頃既閒置土地,已經起到10萬間,足以沖擊現時成個劏窮人既劏房市場,咁樣先真係降低到市民負擔房屋既成本,但係林鄭係成班地產商選佢出黎,啲共住房屋同啲首置樓政府都唔咁挑戰地產商既得利益,啲地又話只可以搵十年內冇發展計劃既賣剩蔗,大家估下佢又敢唔敢攪番平個私人租住市場?

我地當然係希望政府係真心想推,但係如果起得幾間出黎又當做林鄭公關show,最後收到同市價冇分別,根本就冇發揮到貨櫃屋本身又快又平既最強功能,打破房屋租金高昂既問題,又淪為林鄭月娥既房屋政策既一啲粉刷,地產商繼續掠地搵銀,普通市民都係繼續捱貴租。以依家既情況黎睇,我覺得好可能會變成咁。

廣告