今日有個研究智庫，成日將出賣公屋當成解決房屋問題既萬靈丹，每次既研究報告都推銷番同一樣野，每次大家都當佢係新野咁又講多次。最慘係裡面啲爛鬼經濟學佬腦筍都未生埋，周不時歸咎於樓價貴係因為佔中同離婚，當場聽到都真係笑爆嘴，但係香港既房屋政策思維卻係俾班咁既人操縱著，真係唔係幾笑得落。
其實有關土地問題講左咁耐，大家攪清楚未，依家大家既房屋問題係啲付出既房屋成本太貴，唔係要你逼我買樓上車呀，你要拎哂啲公屋一定要買先有得住，以後冇得再平租，咁係變相加劇左市民負擔既房屋成本，減低既係政府既房屋開支承擔，而唔係大家既居住成本呀! 最後啲公屋又賣左出私人市場炒，個end user又係貴買番黎，咁最尾啲樓都係繼續貴。
所有人都睇到你成個智庫親地產利益同親政府既背景同立場，地產商同政府講乜你地就講乜，又係度夾埋一齊推公私合營平補地價，咁你不如直接抄番份施政報告咪得囉，重駛鬼做研究？
成個報告重花左一大章用黎招呼我地，講句多謝先，但你斷章取義咁拎左幾個case出黎話啲閒置地、丁屋地好零散，自己又唔係做全面研究，鬼唔知有啲閒置地係唔適合發展呀？又唔見你個報告講下當中有咩政府地適合發展？唔講下粉嶺哥爾夫球場? 短租富豪地？去左邊？
你為左打倒民間聲音同可能，突顯大家冇得揀一定要跟政府既方向移山填海，竟然花咁多時間去研究啲發展唔到既地，而唔係研究有啲咩地可以點發展，可謂殺得眼紅走火入魔。
研究本身最大既價值就係用黎開創、啟發同構作可能，而唔係用黎包裝、護航同鎮壓民間意見。希望各位研究者引以為鑑，唔好學壞手勢咁做研究，唔係既話你唔好講你自己係做緊研究，唔該。
題為編輯所擬