狄恩返港後發展唔太順利，不過好彩喺印尼仲有市場，東家打唔掂仲可以去打西家搏一鋪。
正正係佢可以用流利印尼話溝通，能夠講得夠順全賴印尼老婆，一個外地人喺印尼返工能夠講印尼話，機會確實多啲。
不過印尼話幾流利都好，冇戰積，冇今日。狄恩喺印尼成名之作，就係阿雷馬年代。2012年，由於印尼聯賽閙雙胞，部分球隊唔想得罪任何一方勢力，就拆開兩隊踢兩個聯賽，狄恩執教嘅阿雷馬，來自國際認可嘅IPL，大家簡稱踢IPL嘅阿雷馬做“IPL阿雷馬”，本身狄恩未掌權時，IPL阿雷馬係A隊，另一隊踢ISL，不被國際認可嘅ISL阿雷馬就係B隊，但係去到半季，ISL阿雷馬因為人腳太差而排聯賽包尾，呢個時候正牌聯賽IPL漸漸勢力削弱，老闆見勢色唔對，抽起大量IPL阿雷馬主力去ISL救駕，IPL阿雷馬就以二三線及被其他球隊遺棄嘅本土球員為主，ISL阿雷馬反成A隊。
不過IPL阿雷馬先可以踢亞協盃，所以會方仲係請咗狄恩幫忙，雖然外援有卡錫同巴域斯等有料系列，但球迷望見本土球員陣容真係冇乜信心，因為唔係過氣國腳就係低組別球員，大部分都係轉會市場冇人喉嘅，加上當時印尼球迷唔知狄恩乜料，只知佢90年代踢過印尼聯賽，所以大部分球迷對IPL阿雷馬後路都係覺得冇乜希望。
起初喺聯賽同亞協盃都係冇乜嘢睇，正當球迷以為球隊同狄恩快將玩完時，球隊突然大爆發，亞協盃最後時刻分組賽出線，聯賽連勝由尾3升上第3，亞協盃16強有巴域斯停賽及4名本土主力缺陣下作客淘汰傑志，就係呢個時候，狄恩上神枱，將一批雜牌軍操到變黑馬，成為神奇教練。
此後，狄恩教過幾支印尼球隊，每次都有驚人舉動，例如重點起用質素平平嘅基士頓，結果喺佢調教下，基士頓變身入球機器，令嘲諷基士頓靠女人上位嘅球迷都啞咗。可惜轉到大會萬隆後就冇咁順利，球隊幾場不勝，佢推薦入隊嘅包括巴倫古素都畀人嘲諷超級水貨，最終以老婆健康為由走人，但大家都知佢咩事要走。
直到今日，佢仲未回復當日，有時人生就係咁，唔會成日咁順利。