政經

熱烈恭賀高鐵再次走數

廣告
熱烈恭賀高鐵再次走數

廣告

1. 政府宣布高鐵票價,西九去福田收80蚊。先莫論你覺得佢抵唔抵,呢個定價明顯同政府之前的講法矛盾,而且嚴重影響高鐵的經濟回報,甚至能否自付盈虧都成問題。

2. 我咁問,係因為高鐵的經濟回報有幾多,營運會唔會長期虧損,都係基於客量預測。份客量預測本身有好多參數,例如人口、經濟增長等等。而一個關鍵的參數,當然係收費。按政府在2016年向立法會提交的更新客量預測,列明「高鐵的車費與現時前往深圳邊界的列車(即東鐵線到落馬洲)及直通車服務的車費相若」,之後所有推算都是由這一點開始的。

3. 現在由柯士甸站去落馬洲站要幾錢?單程票價 45 蚊,八達通就 42.7 。相對於高鐵收 80 蚊,差一倍。再講一次,我唔係要討論佢抵唔抵,而係當日個客量預測話過個票價會一樣的。好明顯,大家都會問,份客量預測要唔要重新做過呢?如果客量預測已經錯?咁財務預測呢?經濟回報預測呢?係咪全部可以入垃圾桶?

4. 再提一次大家,政府講過高鐵有 62% 的旅客係來往深圳的。本來你話收得平,我仲可以假設有些現在去上水買奶粉的會改去佐敦買,幫你谷一谷個客源。事實上,2015年個客量預測已經講過高鐵的商務客會減少,要靠內地「觀光客」來填補。現在貴咁多,班「觀光客」恐怕都係會繼續去上水同元朗「觀光」了。

5. 淨係深圳條數已經錯成咁,都未同你講其他站,你話高鐵點算呢?香港政府,你答我啦!

廣告