立即捐款

Momay

我係熱愛足球嘅油漆佬。 網誌

體育

印尼足球現象——示威及遊行

印尼足球現象——示威及遊行
廣告

廣告

上年印尼甲組聯賽出現一支超級魚腩,34場波得10分,試過單場賽事輸成10球,成季一共失咗過百球,呢隊波就係來自東爪哇工業市鎮Gresik嘅Gresik United(錦石聯)。

上年球隊喺下半季簽入喺印尼踢過一排,早前喺緬甸揾食嘅塞爾維亞中堅Saša Zečević同前南華日援加藤友介加強中後場能力,但因為本土班底能力一般,加上球隊財政出現問題,令到球員失去動力,經常大比數輸波,球隊嘅表現成為上季印甲恥辱,hea踢亦令入場人數急跌,由最高萬5跌到去幾百,看台場面比港超更冷清。

眼見支持嘅球隊陷入低谷冇人拯救,球迷們忍受唔住,喺最近於市內發起一場千人大遊行,要求球隊管理層及市政府嚴正關注及改善球隊問題,球迷沿途高唱球隊歌曲,有人點燃訊號彈及煙霧彈,大部分球迷都著上代表錦石聯嘅黃衫,街頭出現一片壯麗黃海。

球迷遊行去到球隊總部後逗留好耐先離開,代表球迷發言嘅Ludiono就話:「這是一個令人失望的賽季。到現時也沒有改善的跡像。我們希望見到班主,管理層和其他對Persegres負責的各方,因為到目前為止還沒有明確的說法。」

球迷代表人向球隊管理層提出六項要求,希望球隊盡快升上甲組,而正當各支乙組球隊已經積極組班時,錦石聯仍然無動於衷,球迷連有乜球員新加盟都唔知,又難怪球迷會用示威遊行去表達訴求,近年印尼足壇出現好多由球迷發起嘅遊行示威活動,雖然效用未必大,但已經成為一種現象,代表住有唔少印尼球隊喺管理上係好有問題,亦反映印尼球迷對球隊嘅上心程度。

廣告