依家政府對住專貴富豪反對發展既粉嶺哥爾夫球場，近日就急急拋出左2個發展方案，呢個做法真係令我大開眼界。
其實我今日先知道原來做規劃可以咁茅，搵到塊地都可以分「部分發展」同「全面發展」咁多方案選擇。我真係好想幫抗爭左咁多年既東北朋友問一樣野，點解政府發展東北個陣，咁多市民反對毀村滅農，又唔整兩個方案俾市民揀，講到實一定要全面發展，一塊農地一條村都冇得留底？
尋晚公佈左個2個發展方案，睇完佢張規劃圖立即明哂當中玄機。明明「部分發展」方案裡面，東北面個塊地（棕）係適合做高密度發展，但當話要全面發展個陣，個塊地突然就變左好多係低中密度，好明顯就係造低本身全面發展個球場個發展潛力，等公眾覺得發展左都唔係好有用。
咁明顯既偷天換日，你係諗著博人睇唔到？
好啦，政府最尾造左條數出黎，話成個176公頃既粉嶺哥爾夫球場（足足9個太古城咁大），只係起到13000個單位3萬人住。天呀，究竟呢個係一個咩密度？拎政府個份《香港規劃標準與準則》出黎計，我拎個場一半地出黎俾佢起哂三層低密度丁屋，每一公頃40間，都已經起到俾3萬人住啦！依家你估個密度最要低過丁屋？
富豪既代理人自由黨突然走出黎講環保，一開始講160棵古樹，講講下出口術講左600棵，但check番現時個政府古樹名冊，依家係得幾棵。你咁忽然環保，點解東北發展要斬十幾萬棵樹個陣又唔見你出聲？亞熱帶地方既哥爾夫球場日日狂落農藥養草毒害附近水土，又唔見你關注？
政府佢要造地個陣就跨大估算，唔想發展個陣就造低條數，誤導公眾，奸成咁，你重講咩開放土地大辯論？收工啦。