立即捐款

思言財雋

「思言財雋」旨在滙聚金融財經界志同道合的同業友好,致力提高金融界對公共事務的意識及參與,監察政府並推動香港民主政制,助香港社會堅守法治及公義。 網誌

政經

一個金融打工仔嘅心聲

一個金融打工仔嘅心聲
廣告

廣告

業界投稿

劏房專家財爺「焗住」冇計要去「補漏」,但可惜能力智商低下, 可能真係好似電影《Forrest Gump》名言,“Stupid is as stupid does”, 派錢都俾人鬧。查實,市民想政府直接派錢,係因為特區政府政策長期唔可以真正惠民,撥款去為高鐵、港珠澳、三跑填氹就話咁快,但其他嘢就全無長遠計畫,唔理香港人只顧擦北京鞋,用不得其所,嚴重浪費資源。市民與其眼白白睇住特區政府倒錢落權貴個袋,不如睇短線直接收錢算數,自己袋錢自己用。但係林鄭就一直企硬,堅持唔派錢,話呢個係理財新哲學。(其實新咗晌邊?)點知最後連「親共派」政黨都唔撐,於是唯有轉軚。(記住,絕對唔係因為俾市民鬧爆)若果學當年佢嘅「手下敗將」胡鬚曾直接派6千,實在顏面何存,於是諗咗條死橋出嚟,又要派又要條件多多,實行時又需要大量人手同時間,進退失据,一塌胡塗。

呢班庸官,人工一個月幾十萬,但係能力智商窩囊,除咗做奴才擦習帝鞋之外一無是處。若唔做官,走去金融界同商界,分分鐘連工都未必揾到! 而我哋呢班納稅人,就捱生捱死去「進貢」呢班庸官,嗰個僭建律政司司長仲好意思話要用二百幾萬去裝修官邸! 唔該呢班做官嘅,要揾著數就留返晌商界揾真銀,咪去攞一官半職返嚟然後虐待香港人。唔通市民同你哋真係有血海深仇咩!

香港依傢攪到不知所謂,藍色陣營如屈小姐就繼續話係乜嘢「蝴蝶效應」,係「佔領」惹嘅禍,咁不如話係因為太陽黑子影響地球磁場!?其實,依傢立法會已經由「親共派」控制晒,「民主派」就算唔係花瓶,都已經冇乜所謂「反對」作用。所以日後特區政府政策仲係唔掂,就咪賴落「民主派」度,「親共派」肯定難辭其咎。

至於我等冇權冇勢嘅蟻民,除咗食花生外,趁仲有得發聲就盡量講多兩嘴,仲有得嗌「結束一黨專政」就嗌多兩句,仲有得投票就唔該咪咁懶一定要去投,仲未登記做選民嘅就好快啲去登記。一人行一步,總好過日日怨呢怨,移民你又話冇錢,乜嘢都唔做就肯定唔會有任何改變,教仔都係咁教啦,你話係咪?

阿灰
思言財雋 financier Conscience
[email protected]

廣告