朱凱廸

新界西立法會議員 網誌

政經

十一號幹線︰東大嶼都會基建,抑或新西交通「民生」方案?

十一號幹線︰東大嶼都會基建,抑或新西交通「民生」方案?
廣告

廣告

(1)問︰十一號幹線即係乜?

答︰起點係洪水橋新發展區,表面上終點係……無厘頭的大嶼山東北角(近馬灣)。政府宣稱係應對新界西北大量新人口的交通方案。

(2)問︰點解今時今日要關注?

答︰因為財委會(4月13號)今日下晝岩岩審議並且通過左十一號幹線的研究撥款。研究撥款逾八千萬,最終工程很可能數百億乃至逾千億。

(3)問︰去到大嶼山,咁即係去邊?

答︰事實上,十一號幹線去到大嶼山,明眼人一睇,就知係一個斬件後的規劃。即係佢只係一個整全的「新西 --> 巿區」交通規劃的北半段,而南半段係咩?洗濕左個頭之後,咪話你知囉。

目前其實有幾個可能,第一個係通向交椅洲(東大嶼),再接駁跨海大橋去港島;第二個可能係通向青衣西南,接駁昂船洲大橋;第三個可能,就自然係而家最流行的……why not both。

(4)問︰政府出左咩蠱惑?

答︰第一就係文件出口術,轉移視線。2016年的大嶼山「全民新空間」諮詢,十一號幹線係駁去交椅洲,2017年的「2030+」諮詢,十一號幹線亦係駁去交椅洲。但今次的研究撥款的補充文件,運房局卻強調係有可能駁去青衣,特登唔畫交椅洲的計劃出來。

唔通之前用大量公帑去做出來的諮詢文件,竟然係講大話?唔通政府已經從善如流,放棄左東大嶼?當然係冇可能啦。

所以其實講到尾,十一號幹線的南半段,都係99.9%可能通向交椅洲的(或同時通向交椅洲與青衣)。

即係,政府最蠱惑的地方,就係借屯門元朗二百萬巿民的民生交通困境黎過橋,用來推進東大嶼都會的基建政治。

(5)問︰話時話,香港咁少地,東大嶼真係咁唔好咩?

答︰地緣政治而言,東大嶼其實係一個港珠澳大橋的配套,以房屋問題作為糖衣包裝,戲肉其實係港珠澳直駁港島心臟。即,東大嶼人工島對政府最大政治功能的地方,其實係佢係一個橋墩,有了這座橋墩,珠海去中環就只需要40分鐘,大灣區N城融合的「一小時生活圈」,就正式完成了。

至於海中心是否需要建造一座70萬人的死水城,幾千億人工島是否又係用來興建海景私樓,永續地產,氣候變化或海平面上升等又是否要應對,政府只需要虛應故事就了事了,反正地產商必然歡迎。

(6)問︰十一號幹線真係解決到新西交通問題?

答︰目前只有北半段的十一號幹線,充其量只係疏導到大欖隧道的車流。屯門的車流完全疏導不到。若車流在大嶼山東北角導入青嶼幹線,亦同樣係走向青衣西北角的交通熱點/熱區。

最重要係,新西目前的交通情況已好嚴峻了,我們真的要倚賴一個2035年才落成一半的新幹線,去解決今日的問題嗎?

(7)問︰點先解決到新西的交通問題?

答︰有超多野係可以即刻做,而且需要即刻做的——例如真係切實推行彈性上班時間,例如真係積極推動減少私家車的政策(張炳良在離任前吹過水,但一份具體文件都冇),例如所有新發展區的「原區就業」理念要認真推行(要有產業向度而不是單靠賣地),例如政府近年多項港島區政府部門建築會拆卸,係可以搬去新西,例如減少新界西北的發展幅度(可以少啲私樓)。

交通規劃上,屯門至赤鱲角連接路快將落成(大約2020),即屯門車流至少可經屯赤路入青嶼幹線,作為屯門公路以外的選擇。一旦港珠澳大橋帶動的車流未如人意,政府應該確保屯赤路的收費制度,能令公眾善用屯赤路。

(8)問︰政府堂而皇之用「新西交通」綑綁東大嶼項目,民主派應該點算?

答︰政府用八千幾萬搞一個唔清唔楚的東東,呢個東東又隨時變身成數千億東大嶼基建的頭炮,咁民主派可當然應該反對或棄權啦;但關鍵不是今天這份八千幾萬的研究錢,而係研究錢拎到之後,政府便會失蹤兩年,公眾會毫無資訊,亦冇參與空間。過兩年後,又係米已成炊,大家硬食。

沒有民主,便不能解決問題——這才是所有城巿規劃的關鍵。

民主派的任務好簡單,就係要在今日的撥款通過後,盡力令最多資訊盡早提交議會及公眾,及盡力逼令政府為公眾提供參與空間。十一號幹線起唔起,去交椅洲抑或青衣,你有唔同意見唔緊要,但就必須有 say。

廣告