許智峯公開鞠躬道歉，頭先民主黨已經出聲明譴責佢，並暫停佢會藉，送去紀委處理，大家收唔收貨見仁見智，畢竟收唔收貨都視乎你係咩立場同價值觀。
而家好多人想佢死，包括劉慧卿同某啲大佬，劉慧卿竟然跟土共機要許智峯辭職。當成個黨系統動員啲帝制派、黨媒、打手不斷將許描述成殺人狂魔咁批鬥，佢地要人格加政治謀殺許智峯好正常，但劉慧卿你駛唔駛跟得咁貼呀？
許智峯呢次做法極之魯莽、不智，民主黨最合理嘅做法係紀律處分，然後有冇官司就唔係民主黨嘅事。如果咁樣你地堅持都係要判佢死罪，我反而有興趣睇下之後如何上庭個法官點判。就算僭建驊要告許智峯搶嘢，都要證明佢有呢個意圖。就算佢地點都要搵條普通襲擊罪或者非禮罪嚟charge佢，都唔一定告得入。
除非真係告到佢要坐三個月監然後冇得做議員，咁大家無話可說。但如果唔係咁，我地唔好忘記許智峯係民選議員，能夠令佢下台嘅應該係選民投票而唔係劉慧卿。
呢個時候，應該係向公眾解釋許智峯點解會咁激動，爭取公眾諒解，唔係要幫西環手去批鬥。老海鮮而家咁樣幫手造勢，係真心想止蝕？定係想踢走已經離世嘅阮品強保送入區議會嘅許智峯？大家唔好忘記老海鮮無論係真心定私心，咁樣幫手搞死許智峯的話，只會令泛民個勢更弱。
如果司法程序未完之前，帝制派真係要動議譴責，係需要三份二票數褫奪許智峯議席，你民主黨如果契弟到缺席投票俾佢過到，你地唔係保住基本支持，而係梁耀忠一樣嘅千古罪人。
我唔想臭蟲論，但我仲記得周浩鼎私下同要傳召嘅689通水涉嫌公職人員行為失當、柯創盛同葛佩帆嘅學歷涉嫌造假、何君堯涉嫌虛報自己英國執業，要嚴正執法唔該一視同仁。發夢啦你，想告呢班大天二？你問過自己都犯法嘅僭建驊未？
但係，無論如何最後嘅底線一定係要頂住，唔可以俾班老海鮮迫退許智峯。
(RTHK直播截圖)