立即捐款

鍾劍華

理大應用社會科學系助理教授/理大社會政策研究中心主任 網誌

政經

局長邏輯:母語、母乳、腐語、父語

局長邏輯:母語、母乳、腐語、父語
廣告

廣告

之前某局長認為,「出軌」嘅意思係Affair,容易引起某種聯想,所以高鐵冇「出軌」,只係「甩轆」。

呢個邏輯似乎都唔係講唔通喎(如果你相信陳局長嘅話)。

根據同一邏輯,「母語」一詞可能會令人聯想到 Breast Milk (母乳),會令心術不正嘅咸濕佬產生情色性嘅遐想。所以,廣東話唔應該叫做「母乳」,而應該叫做「父語」。叫「腐乳」或「腐語」都唔係唔可以考慮,但就絕對不能叫「母乳」。

如果陳局長之前嗰個邏輯似乎都講得通,大家又妨考慮一下,不但應該承認,仲要高調表明,廣東話係我哋嘅「父語」。

嗰一位正經嘢唔做,只係不斷做埋D擦鞋仔、師爺式小動作嘅教育局長,可能細個嗰陣時飲咗太多過期變壞咗嘅「母乳」,後果仲嚴重過食咗三鹿奶粉,可能仲週不時要硬食「腐乳」當飲「母乳」,搞到佢唔識乜嘢叫「母語」,只識不斷講埋D無厘頭兼且邏輯不通嘅鬼話,俗稱「腐語」。大家千祈唔好信佢,重千祈唔好同佢客氣,要高調出嚟反對佢。

聲明多一次,重駛爭辯?廣東話係絕大部份香港人嘅「父語」。事實上,亦係絕大部份香港人嘅「母語」。

臨走要帶番個頭盔。絕對無意冒犯眾多偉大嘅母親,一向十分支持餵哺母乳。十分遺憾呢個政府一向以來推動母乳餵哺不力,如今仲要想破壞香港人嘅「母語」。有咁嘅政府,有咁嘅局長,係港人嘅不幸。香港社會其中一個最大劫數,正正係有一個咁無恥嘅政府。真係陰毒啲都要講句,鬼唔望佢哋生仔冇奶飲。

廣告