喺啱啱結束冇耐嘅PSSI Anniversary Cup，印尼U23壓過北韓U23唔使包尾，呢三場波印尼U23都可以同對手（烏兹別克及巴林）造成互有攻守局面，但係鋒線把握力喺呢三場比賽好似食咗屎咁，教頭milla就頭痛緊，因為現時冇乜印尼前鋒係可以擔得起大旗，聯賽射手榜頭幾位主要係外籍球員，被評為今代最優良嘅印尼本土前鋒Boaz Solossa啱啱先好返復出冇耐，上季印尼射手榜本土入最多波嘅Samsul Arif呢排沉到爆，高大威猛嘅Lerby Eliandry喺PSSI Anniversary Cup明顯唔太適應國家隊踢法。
所以milla決定揾效力三佛齊嘅Beto踢亞運，佢今年已經37，將會係印尼派隊參加亞運嘅其中一位超齡球員，呢位拎過兩屆神射手嘅鋒將原籍巴西，已經喺印尼踢咗好長時間，雖然中途去過印度同大馬，但好快又返去印尼揾班落，呢位球員喺印尼生涯中射入唔少波，雖然30有7，但能力仲係吊打好多本土球員。
Beto喺今年歸化印尼，外界一直估計呢位射手冇乜機會入選國家隊，因為年紀問題，但現時已經唔係幾多歲嘅問題，只要幫到國家隊，就算40歲都可以入選。