立即捐款

國際

中國必須打好貿易戰——反敗為勝的十招

中國必須打好貿易戰——反敗為勝的十招
廣告

廣告

今日見到有傳聞話,畀美國封殺的中興,休克咗幾日後,已變咗植物人,距死不遠,除時破產。美國佬實在太可惡,如果你心繫家國,如果你想民族復興,如果你想中國強大,你必須期望中國打好這場貿易戰,還美國佬顏色,把特朗普打個落花流水。

要贏呢場貿易戰,中國仍有很多籌碼,加以利用,必定能令美國屈服。反敗為勝的十招策略包括:

1. 中共官員上上下下由習近平到地方貪官,都有大量資金在美國,只要中共下令,將所有大陸官員在海外的資金調回,夾夾埋埋隨時有過千億,不單係打貿易戰嘅最強彈藥,美國佬的銀行突然被提走過千億,肯定立即擠提兼腳軟。

2. 由馬雲出手,禁止美國人使用淘寶,等佢哋買唔到價廉物美嘅冒牌貨、山寨課、假貨、不對辦貨等等,美國佬自然要捱貴貨,捱得幾個月就乾塘,頂唔住要投降。

3. 立即作出高科技反制,禁止美國的Facebook、Twitter在大陸使用,並不准美國人用微博、百度、微訊、支付寶等領先全球嘅技術,等佢哋無法同世界溝通,美國宅男自然會大大不滿,要求特朗普唔好再針對中國大陸。

4. 打意識戰。首先,號召全世界中國人民「剪綠卡」,移民回國,發誓永不再踏足邪惡的美國,等美國內需大減,經濟大受打擊,做成大蕭條。另外,要召喚在美留學生立即回國,等美國嘅學校立即執笠。

5. 然後,派傅振中、剛新婚嘅李偲嫣(如果喺愛河中嘅佢仲啋你)等人去美國,組織「愛字頭」部隊,每日去美國各地示威,喚醒全美華人參與,實行鬥臭特朗普,鬥到佢變臭老九,讓美國人唾棄。美國人智商比香港人還低,呢招喺香港有咁多支持者,喺美國一定更多。

6. 還要派周融等人過去美國搞網媒,開個「Silent Majority of USA」,幫美出聲,日日造新聞,美國沉默的大多數一定相信,很快就會群起反對特朗普,拉佢下台兼遊街。

7. 白宮指中國大陸係「奧威爾式胡言亂語」,中共自然不能接受這種侮辱,應立即拘禁異見作家奧威爾,軟禁其妻子,等佢哋接受劉曉波和劉霞嘅待遇,以顯天威。

8. 為了應付芯片問題,中共要立即學習老毛,仿效全民大煉鋼,實行「芯片大躍進」,鼓勵全國人民自行煉芯片,五年內超英趕美,反制美國的高科技制裁。

9. 搵大陸學者宣布鄭和率先發現美洲(一如指粵語不能做母語),美國自古以來都係中國領土,為輿論批鬥作好準備。

10. 最後,必不可少嘅一招,當然係重金禮聘剛預測大馬選舉國陣會贏嘅「燒山」,由佢親口喺網台預測「美國貿易戰將大勝,中共將後悔莫及」。燒山今時今日已成名將韓信,佢企邊邊,邊邊就會贏……唔係,就會輸,所以爭取燒山,係貿易戰決勝嘅最關鍵。

廣告