人在大馬，都忍唔住唔講呢單野。
琴日有朋友就send左個報導畀我睇，就話政策創新辦既人選出台，問我點睇。我就問佢：「乜而家仲會有能力既人入政府咩？」
之前個青年發展委員會，其實我都評過，最後成員名單好多都係青年組織、富二代、官二代班人，再加埋派餅仔畀友好政黨，最終都係門面野為主，實際有咩作用？對唔住，真係未見到。創新辦而家搵埋既人，數到既都係前記者兼前建制議員助理、團結香港基金等等唔同智庫既研究員，數來數去，班人其實都係同一個來源，就係要有建制味，而且仲要係三四線嘅建制人。當建制味咁濃既時候，又點會真係做到堆「創新」既政策？
同埋，而家個政治氣氛雖然未好似梁振英時期咁差，但都唔代表林鄭咁樣做就會可以「與青年同行」，吸引到一班後生而有能力既人入政府。雖則話，公務員年年請人，後生既就年年報名，就算去到警察都有大學畢業，可能參與過傘運既人報名，但創新辦呢種要拋頭露面，成為傳媒焦點既職位，一出來就可能要畀人認成世既，有能力既人除非有紅紅既建制心，又有邊個會出來做呢啲位呢？而同時，又要出面、但行頭又唔係副局、政助呢啲位，就算人工都算係ok吸引，一二線嘅人又點會願意屈喺呢啲部門仔聽人點，特別係聽班唔知係咪高班過自己嘅公務員、副局、政助點呢？
講到底，其實創新辦都係林鄭做出來，想搵後生既去endorse佢，喺當時同曾俊華較量時，拎返少少年輕人既支持，但好明顯就完全失敗。而去到而家，中策組冇左，創新辦要頂上，又搵到一班咩人入去呢？咪就好似個委員會自薦計劃咁，政治成份良好，有一定背景，咁咪容易上到去做咁囉。而做得創新辦嘅，一二線人馬又點會屈就喺呢啲部門仔呢？而最後只得返三四線嘅人，能力、級數又有幾高？有冇大變，有咩意義，又真係諗唔到會改變到咩同有咩意義啵。