我很喜歡第一集《皇家特工》，黑色幽默玩轉傳統特務電影，同時動作場面凌勵打得爽快，教堂一鏡到底大混戰同爆頭煙花叫人印像深刻，續集《皇家特工：金圈子》我當然會繼續捧場。這集故事開場不久，皇家特工變冚家特工，成個特務組織一鑊熟，死剩主角Eggsy同光頭佬Merlin，如此別開生面的開場倒很少見。
看這套電影的觀眾，大慨對故事不會有太多要求，大至通順就可以收貨。與上集一樣派便當亳不手軟，總之角色會唔會死，點樣死法，你完全估佢唔到。這一集新加入美國特工組織，英國紳士對美國牛仔，原以為有些英美文化不同的笑話，不過戲中卻激不起什麼火花，白白浪費了一個笑料好題材。這套續集的最大問題，是動作場面的設計比不上前作，除了重演酒吧閂門教仔變蝦碌版，其他的動作場面太過普通，沒有上集那麼爆。開場追車是好看但流於行貨，雪山偷解藥只是配角打雜魚，最後主角兩人攻入大佬基地，打機械狗只是純萃搞笑，Eggsy打Charlie是完全在打爛仔交。只有最後打威士忌那場勉強合格，但始終二打一缺乏緊張氣氛，人肉紋絆機的安排太刻意沒有驚喜。
上集的壞蛋網絡富豪要創造新世界有理想很有氣勢，今集當壞蛋的Poppy姨姨反而似是丑角只負責搞笑，令整套電影失去焦點，浪費了一個金像影后的演出。將毒品變成奪命噴血毒藥純萃惡搞，反正毒品最終都是殺人，分別只是遲死定早死，是全身彊硬爆血死，還是變道友病死。最後壞蛋是美國總統和特務威士忌，認為今次是難得解決毒品問題的大好機會，吸毒的人死光了，不就沒有毒品問題。其實那些道友就算死唔去，見過鬼仲唔怕黑咩，立即戒毒以後遠離毒品。看來Poppy姨姨用心良苦，改撈正行後發財立品，順便幫人戒毒。
今次續集打鬥不行，奸角又沒有魅力，上集出位成功是兩大皆從缺。我是在搭飛機時看這套戲，看到三個皇家特工正準備殺入壞人基地，理應最繄張時候剛好要落機。之後我完全沒有追看結局的意欲，拖了成個星期才的起心肝看埋結局，咁你話套戲好唔好睇喇。