攝：Alex Leung
我當年反對東北新發展區，估唔到前規劃署署長梁焯輝退左休重係對我念念不忘，今日在我地本土研究社既論壇上走出黎話當年，公開指罵當年反新界東北規劃的青年人（應該包括我）阻著搵地起樓，又反問當時點解要反對個陣佢攪出黎既新發展區（NDA）方式開發，講到土地問題由青年人而起咁。
對事不對人，雖然過往我唔否認我當年都係個幾打得既對手，但其實我對你並無私怨，請你唔好誤會，個陣提出反對新發展區既理由好簡單，等我同梁焯輝你再重溫一下：
1. 政府拎成千億偏揀新界東北開發，係為左幫地產商同埋陳茂波之流釋放上百公頃囤地，用公私合營幫佢地整合地權起豪宅，其他小地主同農民就要被強制土收。
2. 策略性新發展區既文件係寫明係做「深港社會經濟融合」，打通邊境地區規劃大量創科地俾大陸專才落黎特惠工作同居住，所以坪輋新發展區個陣係100%都係豪宅，土地分配都係私樓主導，諮詢港人之前係北上諮詢左啲深圳官員先，唔係真係解決我地既實質居住同生活需要。
3. 反對新發展區規劃推土機式「無差別開發」，見非原居民村同活躍農地就剷，棕綠不分，反而新世界地產啲空置鬼城就有得差別特殊保留，重送多幾十億地積比俾佢起樓重建，原居民村就可以擴展丁地。
4. 你拆原居民村就可以幫佢地全方位搬村，拆人地住左2-3代既非原居民村就等啲地產商用最原始方式收地趕佢地走，毫無公平性可言，漠視基本居住權。
5. 俾哂替代方案你，包括哥爾夫球場同棕土優先等等，政府在公眾參與過程充耳不聞。
我關注東北發展都已十年了，直到目前一刻，請告訴我，究竟以上既理由有邊個到依家係唔valid?
回顧新發展區的爭議，2012年變成左全港性規劃爭議，你地就急急腳轉變策略，硬銷新界東北係「香港人既新市鎮」，話私樓整「港人港地」防大陸炒家，但上左馬通過左之後就立即取消埋，根本變左個天仙局暗渡陳倉。
爭議後一年，你地在新界東北規劃抽走左坪輋，放左入去新界北新發展區，策略上改變左話「盡量」唔影響活躍農地，話「城鄉共融」。姑勿論係真係假，就係間接承認左之前新發展區無差別開發既失敗，當年爭議係政府既粗暴規劃一手攪出黎。
個陣叫你交代清楚規劃出黎啲地點用同俾邊個用，就業機會俾咩人，規劃署就話仍然係土地規劃階段，唔係我負責。
我地質疑陳茂波係知道地產商既地權分佈，而唔係按土地現狀去規劃，上到去立法會否認知情，就立即被踢爆你曾經在開動東北規劃個陣，已經私底下做好份東北地權研究做內部參考資料，根本一開始就知土地誰屬。
梁焯輝先生，你退休後去大學教書，我聽過一次有大學生上你堂個陣在傳反對東北規劃的聯署一齊簽名，你是知道的，因為俾你當場睇到重上堂同佢地「訓話」。
而我講到呢度，如果你重係覺得自己冇問題，新發展區冇問題，調轉槍頭話係青年人阻著部堆土機導致房屋問題，咁我只可以恭喜你，土地大辯論裡面「新發展區」（NDA）既土地選項，將會繼續成為惹人憎惡的建議。而你做左一世人規劃，最後一世都唔會學會規劃究竟係件咩事，請你自己諗諗。