立即捐款

媒體

近N年全球最成功收購,兼講中國最古老嘅Private Equity

近N年全球最成功收購,兼講中國最古老嘅Private Equity
廣告

廣告

買Instagram,係Facebook史上最佳收購,甚至係近N年全球最佳收購。

六年前,Instagram得十三個員工。Facebook用十億美金買起佢。估下而家Instagram值幾錢?答案係:一千億美金。六年,一百倍回報。留意Facebook第二大收購嘅Whatsapp,在四年前,都要一百九十億美金了。

當然啦,Instagram本身冇上市,其實唔存在一個市值。但亦都可以估值,而個估值係彭博做嘅,咁彭博Bloomberg Intelligence啲友勁過我同你,所以應該可信。係一千億,就一千億。預計五年後Instagram可以去到二十億用戶,追平Facebook。而家Instagram已經有十億用戶。

用戶基本上用Instagram嘅時間,同用Facebook差不多。如果係安卓用家,大約就係一日一個鐘。另外,估計Facebook嘅流動廣告收入,大約有30%嚟自Instagram。

咁所以,小朱真係商業天才咯。一來食走個對手,二來帶到協同效應,三來仲要買得平 — 執返一百倍喎!

咁但,係咪等於當年Instagram十三丁友賤賣?又不能咁講。首先,十億美金十三個人分,基本上都發達唔使做。另外,各有前因莫羨人,唔係畀Facebook買咗,Instagram今日仲係咪值一千億?應該唔會。就係在Facebook手上先發揮到功能嘛。我成日講嘅莊子故事:

宋國有家人,世代洗衫,但手好易爆拆,所以就發明咗種藥,搽咗就唔會爆拆。有個外人知呢件事,就用百金(唔知即係幾多,但睇埋落去)買佢呢條秘方。呢家人商量過後,喂,我哋世世代代洗衫都係得幾金,而家有百金,即係幾世唔使做嘅錢,賣啦。然後呢位外人,拎咗條秘方比吳王。吳王又洗衫?唔係,係同越國打仗用。吳王冬天出兵,打水戰,越國啲友凍到手都爛晒,吳國冇事,易過英格蘭炒巴拿馬。呢位外人就獲封地為侯。

故事教訓?一,我國古代已經好尊重知識產權。二,我國古代已經有好成功嘅Private Equity.三,我國古代已經將民間科技用落軍事

係拎百金,定係封地為侯,各有前因莫羨人。去到幾千年後嘅今日,仲會有人鬧呢個外人不事生產只係炒賣,佢又唔使整藥又唔係打仗 — 但佢係中介人,扯皮條,釋放價值嘛!冇佢,宋國人連百金都冇,吳王亦打唔勝仗。三家win win win,係你啲loser眼紅人哋啫。

一樣,Instagram唔係比Facebook買起,肯定唔會今日值千億。甚至執咗笠添。有幾奇?可能小朱當年係買Snapchat呢 ? 而家掉轉啦,Instagram十三丁友奀奀腳做乜都得。Snapchat條死靚仔?Turn down a billion dollar 咁串下話,搞Miranda Kerr咁爽下話,小朱實迫到你賤賣或執笠。敬酒唔飲丫拿。

原文刊在作者 Medium
作者 Facebook Page

廣告