其實我對英格蘭冇乜好感，但老實講，我係幾欣賞英格蘭團隊，喺背後為一班征戰世界盃嘅國腳所做嘅事。
1）搵心理醫生調整心態
英格蘭知道自己有「12碼魔咒」，22年嚟射7次輸足6次。為咗減低球員心理陰影，除咗瘋狂每日練習射12碼，仲搵嚟心理專家輔導，了解下球員射12碼面對咩問題、點樣放鬆心情、主射嗰陣點樣呼吸之類，用各種方法調整球員心理質素。最終英格蘭十六強互射12碼淘汰哥倫比亞，即使係球員自己把握機會，但心理醫生其實都幫唔少。
2）鼓勵帶家人去睇世界盃
球員為咗踢世界盃要暫別家人，短則幾星期，長則成個月。修夫基係一個好重家庭觀念嘅人，佢講過同屋企人相處係放鬆心情嘅不二之選。
心知球員難忍同家人分離，所以佢好鼓勵球員帶家人去睇世界盃，等球員可以喺世盃期間同家人有相處時間，唔使心掛掛，「自摸奶奶」。八強嗰陣，就有唔少英軍成員帶埋朋友、親友、老婆、仔女一齊睇比賽，完場之後仲一齊留低合照、吹水、慶祝。
3）畀戴夫離隊迎接新生命
十六強嗰陣，戴夫因為老婆臨盆在即，修夫基允許佢暫時離隊返國見證囡囡出世。可能你會話戴夫唔係正選球員，離隊影響唔算好大，但係入得選就代表佢隨時要候命。
其實兩年前，曾經有位籃球員因同樣原因喺比賽中途離場，賽後有記者批評球員冇職業道德，該球員嘅教練好霸氣回應一句：「球員一生中有好多場比賽，但孩子出生的那一刻就只有一次。」，所以以修夫基咁重家庭觀念嘅人嚟講，畀戴夫離隊絕對係一件好合情理嘅事。
雖然落場踢波係靠呢23個人，但都仲有一班幕後團隊喺球員背後默默付出。佢哋嘅功勞未必可以每每喺場上展現出嚟，但重要性唔可以忽略，尤其修夫基作為領隊，要識得點樣令球員放鬆心情，令佢哋保持作戰狀態。佢將家庭觀念放入佢嘅足球哲學，完全係有別於其他領隊作風。
足球，唔一定只係場上戰術，背後點行每一步都係一種學問。當初會覺得修夫基未必係一位好出色嘅領隊，但而一刻我從此對佢改觀。