立即捐款

教育

浸大 Top Secret 之陳浩南做校長──就好喇

浸大 Top Secret 之陳浩南做校長──就好喇
廣告

廣告

「點解學普通話?
 埋堆囉,功利主義,搵食。
 我唔妥你,我可以考你;
 你唔鍾意我,我可以停你學。
o靚仔你睥咩呀? Quit U 吖!
 Quit U 呀!
 Quit U 吖! Quit 吖!」

認真,香港浸會大學個校長錢大康同佢班o靚,真係咁講嘢㗎。普通話豁免測試、「佔領語文中心」事件搞到滿城風雨、北京震怒,一個月後記者趁春茗請錢校長講兩句,條友愈噏愈唔對路:「我希望學生可以學習西班牙語同阿拉伯語,因為熟悉四種語言,邊度都做到嘢。」「識哂就度度都做到嘢……識溝通先可以埋堆!」原來各位同學每個學期交四萬二千文學費,就係為咗「埋堆」──仲有,攞張畢業證書。

「我唔妥你,我可以考你」,查實浸大個普通話畢業要求,係針對母語係廣東話啲本地生而設㗎;「母語非中文」、「曾參加內地教育部『普通高等學校招生考試』或台灣教育部『多元入學方案』中國語文科考試」三種人上人,均獲豁免。孔夫子話「有教無類」,啱呀,所以浸大咪奉行「有啲同學比其他同學更平等」原則囉;信耶穌㗎嘛,唔踩到本地生、廣東話賤過地底泥,點顯得「大凡先知,除了本地本家之外,沒有不被人尊敬的」?

「你唔鍾意我,我可以停你學。」第五十屆學生會幹事長劉子頎比其他同學用多一粒語氣助詞,罰足一個學期停學;「浸大山神」創辦人陳樂行當日冇粗口,照收即時停學令──證明停學不停學,無關粗口唔粗口,錯就錯在劉會長舊年六月幫過保安、清潔工友抗議外判商侵吞血汗錢,陳同學就五月出過 post 「宣傳」普通話畢業要求、奉勸文憑試考生「千祈唔好入浸大」,得罪咗方丈。

「o靚仔你睥咩呀? Quit U 吖! Quit U 呀! Quit U 吖! Quit 吖!」事緣今年五月十號,浸大「審視畢業生溝通特質」工作小組開會,席間有件教育學系出身、食鹽多過其他人食米嘅校方代表袋咗嚿錢落學生代表雷樂希個袋:「你唔鍾意咪 quit U 囉,我哋大學就係咁。其實我哋同中學冇咩分別㗎咋,都係 offer 啲嘢俾你跟住讀。」難聽到同檯文學院副院長羅秉祥亦為之側目,最終憤而遞信,毅然退出小組。

陳浩南教書,有云:「其實讀唔讀書,我理唔到咁多;但係我想話俾你聽,行錯路,冇得返轉頭。」佢知道教育冇得勉強。浸大啲「強硬派」則不然,主張「對學生寸步不讓」、認為「校方若讓步,日後學生就會繼續用衝擊手法來爭取其他要求,逼大學讓步,咁樣就後患無窮。」二〇一五年七月,陳新滋退休,如果浸大當時搵咗浩南而非大康繼任做校長,今日何至於此?

但歷史冇如果。「我想話俾你聽,行錯路,冇得返轉頭。」銅鑼灣曾經揸 fit 人陳浩南,如是說。

(後記:是日午餐,兩片吞拿魚刺身落肚,諗起香港浸會大學可謂高等教育界嘅明將迴轉壽司──鹹魚壽司、啫喱壽司、白飯壽司、梅菜扣肉軍艦、紅豆軍艦……尚稱壽司,點解「大陸化」唔算「國際化」?只考本地生普通話、懶理留學生廣東話,唔叫幫助學生「精通兩文三語」?未審先判、先斬後審,又唔係「培養浸大同學成為有道德、肯承擔的公民」嘅「既定的紀律程序」?明知咁伏, JUPAS 仲敢擺 Band A 博入浸大「朝聖」啲勇士,真係板長「錢大康夫」好兄弟呀!)

廣告