立即捐款

仙道彬

《蘋果》體育專欄作家,情迷NBA,執着本地籃球,最愛落場打波。 網誌

生活

麻甩書展攻略

麻甩書展攻略
廣告

廣告

剛完世盃,書展又至,冇乜時間細寫推介,只能提供「我最想買系列」,全部個人口味,偏向麻甩同運動向,或者係支持老友,大家有興趣可以按圖索驥。各位有好書推介,不妨留言,交流一下,其實仲有好多想買,但真係冇時間寫啦,家中亦早已爆架!

假如貪八折,其實去樓上書店都有,部份更低於八折,唔需要去書展同人迫。想多謝我?唔使請食飯,送本C琦妹(就憑呢句都知我中年兼麻甩)寫真畀我就得,其實我最想推介呢本,又可以幫到香港單親協會,不過唔敢寫......

《如何避免成為一個油膩的中年猥瑣男?》(馮唐/天地)
一向有睇馮唐,讀醫從商北京朝陽人,文風放蕩似成人版的九把刀,但筆下人物更有味道;我喜歡《不二》同《萬物生長》,成日睇到偷笑。呢本書名夠長,也係中佬最怕的事,當然要買了。

《倪匡散文集》(倪匡著、王錚編/天地)
倪匡先生的衛斯理在大台播放中,所以不少後生仔問我邊本最好睇,通常我都先推介《老貓》、《原子空間》、《頭髮》、《紙猴》(地底奇人)、《木炭》呢幾本,但會補多句,睇佢嘅散文,學到更多。

《黃易散文集》(黃易著、孫立川編/天地)
黃易散文數量不多,比其他武俠小說作家都要少,之前多於報章上讀過,今已不存,所以更值得買。黃易的武俠係經典,看其散文又係另一味道。

《雞鳴報喜》(林國強口述、查小欣報筆/天地)
不少親人都在麻雀館工作,甚至是為雞記打工,我年幼時也經常在雀館坐定定邊飲橙汁,邊睇人打牌,所以本書可謂童年回憶。今日的麻雀館已變成靠大陸人支撐,打的牌也早非港人那套,所以這本口述歷史,更加珍貴。

《逆權車長》(葉尉琳,即抗議的九巴車長/白卷)
香港的「運動」,多以失敗告終,帶頭的,更難有好下場。這次九巴工運,也是一樣,事件過後,再冇人理。一個女人能有此勇氣,非常不易,所以此書不容錯過。

《男人的集體回憶》(伍家謙/白卷)
既撐朋友,而我也是充滿集體回憶的中佬,由《入樽》到李麗珍,全部都中,人越大越鍾意緬懷舊事,既然當今生活迫人,那倒不如重溫美好的九十年代。

《日本美食博覽—細細聲告訴你30間東京好餐廳》(健吾/白卷)
開頭以為呢本係史兄出品,可惜呢個仆街今次冇出書。香港十個有九個都鍾意去日本,熟東京多過旺角,但係永遠都發現好食餐廳係要內行人推介先搵到。健吾,應該就係可以跟佢搵食果個。

《別人的歌》(林夕/亮光文化/請去樂文攤位購買)
其實前日在樂文揭過,已經想買,但都係想留待去書展,捧住一堆書歸家會更開心。作詞者從來與歌手有糾紛不清的關係,看詞人剖白,淋漓痛快。

《遺恨》(鍾曉陽/新經典/請去樂文攤位購買)
大堆名人推介,包括馬家輝、王家衛和朱天心,我細細個(真係好細)就讀《停車暫借問》,因為當時表姐書架上,一邊是《尼羅河女兒》,另一邊是小說,其中一本就是《停》。我不會說風格似張愛玲,但讀下去,會有此感覺。在時代錯亂之間,找尋真愛,永遠都吸引讀者追看。

《深夜食堂第20期》(安倍夜郎/新經典/請去樂文攤位購買)
不經不覺,深夜食堂也來到20期,我在前幾天已忍不住先買。今期畫風有變,也多寫夫妻分開後的感情事,比之前故事,更多動人之處,更多教訓。新讀者當成獨立故事去看亦無有不可,熱戀中人,或多年夫婦,都值得細讀。

《龍頭》(余兒/創造館)
吸引我的,是書名,是作者,是包裝。有看九龍城寨,更期待歷時三載才完成的《龍頭》。當今世道,除了牛津出版社,我估不會有太多書商肯如此不惜工本。與其說支持朋友,不如說欣賞他對書本的執迷。

《香港重機》(葉偉青/創造館)
朋友兼球友,時常看到他在fb專頁上不斷畫畫畫,最正係筆下的機械人與港人息息相關,香港元素有垃圾桶有香港紅van有雪糕車,書本之餘,我更想買「人人搬運」機械人。

《開門有光 — 十個自閉孩子與爸爸》(譚蕙芸、黎苑姍(阿離)、鄭美姿、陳嘉文/三聯)
香港對自閉兒童認知不多,難得有記者願意找個案,然後花上大量時間去敲開被訪者心窗。很多人以家庭壓力為藉口,作出種種叛離傳統價值之事,比起書中提及的辛酸,自會明白真正愛家之人,應當如何。看厭了即時新聞,這種深入寫作,才是我杯茶。

《4張幾單身手記》(Cuson/明報出版社)
呢個唔使多講,因為,所以,支持。

《林燕妮紀念文集——寂寂燕子樓》(林燕妮/明報)
林的文筆不似一般女作家,爽快清楚,而又有閱人無數的霸氣,這本是明報結集,從此燕子樓去,只能在文字上緬懷餘香。

中文字典(中華書局)
想學中文,睇書係不二法門,遇上不懂的生字,想網查,解釋不足,字例也不夠,查字典,係好習慣。舊時書包一直有呢本,用到爛晒,現在買中華字典或詞典都係30蚊,要買。

開放時間:
2018年7月18-19日(星期三至四)
上午10時至晚上10時
上午10時至晚上8時(五樓展館)

2018年7月20-21日(星期五至六)
上午10時至午夜12時 (一樓展館)
上午10時至晚上11時(三樓展館)
上午10時至晚上8時(五樓展館)

2018年7月22-23日(星期日至一)
上午10時至晚上10時
上午10時至晚上8時(五樓展館)

2018年7月24日(星期二)
上午9時至下午5時

廣告