立即捐款

生活

《兄弟班》:音樂造詣同團員友情,係成反比嘅

《兄弟班》:音樂造詣同團員友情,係成反比嘅
廣告

廣告

夾 band的秘訣就是不要散 band,這比什麼都重要—陳友

睇完《兄弟班》,令我諗起好多嘢。

套戲,講真,普普通通,好難話好好睇。但都建議大家入場。唔止係講咩集體回憶咁廢。我雖然老,而比起同年嘅同學我睇更多舊戲聽更多舊歌,但不能矯情到話對溫拿好有感情。譚詠麟開始單飛時係1975年,我都未出世。咁你話可以有幾有感情?我細個時係聽譚詠麟《愛在深秋》《霧之戀》《幻影》。至於溫拿呢,係我老豆同老母好迷的。真喎,我老豆年青時(即係生我嗰時)成個夏韶聲咁款(是真的),應該係咁呃咗我老母上床然後有埋我然後奉子成婚。

講真,而家啲小朋友,你同佢講少年五虎都唔識啦,在大陸紅到爆嘅鍾漢良都好多人唔知係香港人。少年五虎都唔識,你同佢溫拿五虎?得罪講句,在新一代眼中,五個都係仆街死廢老。譚詠麟係建制藍絲,愛國挺董支持國教反日貨。鍾阿B就破產兼搞上件臭西章小蕙,啲女又發明星夢。彭建新呢?哈,我同所有三十歲以下嘅朋友傾計,都冇人知佢乜水,我要講「OK仔老豆」佢哋先知。我肯定OK仔死咗(係喎,死咗了)多人講過佢本人死咗。而好肯定第時彭建新死時,傳媒都會講OK仔。仲有個永遠冇人識出嚟明顯老一截(而家拉近咗了)嘅阿強。最正常嘅應該係陳友,但一樣係一早返大陸做生意(訪問有講,當年有人搵佢開老翻VCD廠,拎把尺一度就可以出貨。度乜?唔係度VCD,係度銀紙)。但陳友算係仲幾活躍於娛樂圈,早幾年拍Juno套《殭屍》咪有人識。

呢套戲,好易被理解為廢老打飛機想當年之作。但其實唔係。溫拿五虎今時今日嘅地位(同身家)仲要做呢啲嘢?況且,個個早年搵埋唔少錢,就算真係投資不利都肯定有兄弟打救,真係唔使仲話好似某啲人(下面會講)咁明明反晒枱但又要隔幾年合埋一齊搵錢。而套戲係陳友編導嘅,我有理由相信,佢拍呢套戲唯一嘅原因,就係為咗友情。

就係咁簡單。但,又係咪真係咁簡單?你睇下身邊,有幾多朋友可以係四十五年嘅朋友?仲要大家發展唔同,有人撈得掂有人撈得唔掂喎。四十五年五個都做到朋友,你估容易?

呢套戲,要批評嘅可以好多,包括搵個大陸仔做鍾阿B,包括搵兩條台妹做溫拿嘅女,唔知想點。但只係睇下溫拿五虎嘅真友情,就值回票價了。

我有個關於樂隊/組合理論,就係「音樂造詣或成就,同團員友情,係成反比」。其實邏輯好簡單,有才華嘅人往往都臭串。成唔到名還好,若果大紅大紫嘅,當然之後就係分贓唔勻,妹妹仔只係追住靚仔主音,或者有人想單飛,或者唱片公司叫你踢走啲廢柴隊友,或者有人不滿做乜你打個鼓又分同我一樣,諸如此類。

當然只講理論嘅,維園阿伯都講到好似言之成理,你啲網友個個都中國經濟專家。咁講下實證。你睇Beyond達明太極同溫拿 就知。我其實冇乜偏好,為咗扮晒有型甚至鍾意最唔紅嘅太極多啲,但一般人心中呢,音樂嘅嘢,Beyond最高,無可質疑。達明好似好過太極啲,至於溫拿,頂,識音樂架咩?

(其實好明顯係識的,溫拿紅褲子出身然後畀人賞識,唔係唱片公司造星捧出嚟,點會唔識?況且溫拿前身都音樂節攞獎,曾經砌低許冠傑添)

咁你睇下,後來Beyond變成點?我最記得家駒過身廿年,有期壹周刊,又係佢哋啲恩怨情仇。列晒啲恩恩怨怨出嚟,個表叫做「我是憤怒」。然後又列晒佢哋(主要係家強)啲物業出黎,個表叫做「再見理想」。我估我唔係仇富,但你一個二個又住太古城又話有寫字樓收租嘅,仲上台我是憤怒打倒建制愛與理想,我就覺得唔知點咁。仲有家強成日在大陸開show,被譏為「仍然自由自我,永遠高唱我哥,走騙,千你」。達明一派,一樣係口和心不和(其實口都唔多和),人人只識明哥係型男潮童,但講音樂我輩廢老都知劉以達先係核心。隊嘢都叫「達明」唔係「明達」啦。可惜新一代只當劉以達係周星馳電影嘅丑角,同埋呢條友忽忽地。

2013年咋下,我都唔知可以有幾我是憤怒,嬲個租客未交租?

太極七子就好啲啦,一份糧七條友分,真係雞碎咁多。加上太極又唔拍電影咁滯,又冇乜咩廣告之類。但弔詭嘅係,正係因為太極一份糧七條友分,又唔係真係好紅, 冇當自己明星,自問做唔到Beyond,大家先咁多年做到兄弟—因為一條友一個月分幾千銀,個個都只係當副業,自己有正職,冇諗過要靠佢搵食,咁咪掂咯。正所謂能共患難不能共富貴嘛。唔係我老作,太極訪問自己講,十分好睇。

溫拿呢,真係一個異數。異數在佢哋紅,但都冇反大面。小反當然係有,套戲入面都有提。你諗都諗到,譚詠麟同鍾阿B(特別係阿B,但點解後來佢發展不如冇咁靚仔亦不見得唱得好過佢嘅校長就另一故事)擺明比彭建新陳友同阿強更加有個人魅力,fans亦都係鍾意佢哋多啲(例如我老母)。譚詠麟好早單飛,後來成為天王巨星,鍾阿B都單飛,都紅過下。彭建新都係唱歌,但就真係冇乜點紅過,外型問題(所以唔好以為當年啲觀眾唔膚淺好重視實力,正係最冇實力嗰兩個紅的)。阿強一早移民,陳友就冇唱歌,拍咗一輪戲,算比較聰明。

你係唱片公司想捧,一定唔會成隊咁捧。一定係譚詠麟同鍾阿B。佢兩個未必有心飛起兄弟,但其他兄弟點諗?你施捨我呀?就當拍親戲都要五個一齊,廣告又要五個一齊,都唔會長久的。唱片公司電視台奈你唔何,譚詠麟同鍾阿B唔出聲,剩低嗰三個分分鐘更加唔好意思啦。

你睇專訪單立文,都有提過當年Blue Jeans又係咁上下,佢自己拍電影(西門慶嘛),另外蘇德華黃良昇叫佢一係唔好拍戲,一係安排三個人都有份,結果不歡而散,黃良昇就話佢提出,費事阻人發達。留意單立文嘅訪問一樣有講呢個詞,《兄弟班》。

所以溫拿拆夥係必然。往後另外三人生活點,唔係好知,我唔係佢地粉絲,但套戲有講彭建新後來發展唔多好,搞生意又唔掂,有理由相信譚詠麟同鍾阿B都有幫過佢。

最重要係,套戲係陳友拍,唔係譚詠麟同鍾阿B拍,不存在話咩發咗財想立品仲打飛機講自己接濟兄弟之類嘅嘢。套戲亦都係由陳友阿強彭建新三個嘅視角出發,佢地三個先係主角,因為譚詠麟同鍾阿B嘅故事大家聽夠,但有冇人諗過另外三位咩感受?我有理由相信,陳友拍套戲,就只係為咗歌頌大家嘅友情,做個紀念。差不多七十歲啦大佬。

陳友,英文名就係Friend Chan(其實真英文名係Anthony,但反正陳友都唔係真名)。由佢去做呢個角色,最好不過。佢訪問入面亦都有提,佢就係呢個和事佬,搞笑嘅角色,眾人嘅潤滑劑,一早搵到自己定位。亦都一早知自己音樂唔得,轉投電影。成隊band個個做天王,唔得嘅。

無論點不滿譚詠麟嘅政治立場都好(都未講埋阿叻添,係呀,溫拿其實都好關阿叻事,新一代好多唔知),甚至否定埋佢嘅音樂貢獻成就影響力都好。單睇呢段四十五年嘅友情,都值得入場了。你估真係咁多「千載不變」?四十五年喎,and still counting.

最後想引返陳友訪問嘅一句

係,溫拿重組過 N次,筆者曾訪問 Beyond某成員:「點解 Beyond咁難重組?你睇溫拿幾易話為?有錢齊齊搵嘛。」某成員答:「溫拿係一隊表演性質嘅 band, Beyond追求音樂理念,道不同便很難合作。」陳友這天笑笑說:「他說得完全正確。溫拿沒什麼音樂理念,溫拿永遠把友情擺在音樂之上,太介懷技術間的高低,容易互相嫌棄。

都話,音樂造詣,同團員友情,成反比啦。陳友都就快七十,實在唔使去扮話「我地都好追求音樂理念呀」。追趕跑跳碰,文無第一武無第二, 家下乜野都假最好係笑下玩下啦。去到某個年紀,你發現唔使同朋友鬥叻,友情其實最緊要。

用呢篇文獻畀剛過四十歲生日嘅自己。同埋我嘅朋友

Facebook 專頁有更多短文: https://www.facebook.com/ivanliresearch/

後記:雖則我冇乜人識,亦都冇乜人care,但都循例利申下,套戲係唔使錢睇的。多謝州立邀請我睇,雖則我有時都唔記得我係因為本身Facebook Page嘅身份,定係香港01嗰邊畀飛我去。都唔使分咁細。

咁你要絶對潔凈話利益衝突嘅,吹你唔脹。但即係我有咁cheap洲立都冇咁cheap,實情呢類傳媒場我睇過N咁多次,但其實寫嘅唔多。好似得《少年滋味》同埋《英倫對決》,呀,仲有葉氏化工套《20:16》。好似係咁上下。咁你話,呢幾套都寫好喎。係呀,因為真係覺得好睇。咁覺得唔好睇嘅?咪唔寫咯。貫徹返呢個誠實嘅宗旨,不求話做到心諗乜講乜,人哋請你你唔鍾意咪中途離場,或者下次唔好去。寫衰套戲就唔係我作風,加上亦冇乜必要(做乜要浪費時間呢?)。即係,寫得好睇嘅真係好睇,而冇寫好睇嘅可能都好睇(主要我懶冇寫啫)。但又真心講句,咁多年嚟人哋請去嘅,好似都冇乜邊套好爛,係咪真係影響咗我主觀判斷呢?唔知。但總之我唔會覺得好爛而話好睇咯。總之,做唔到知無不言,但講得出就係真。

以後會將呢段嘢當係template咁貼。

原文刊在作者 Medium
作者Facebook Page

廣告