本土研究社最近發佈《富稅難收：香港股權轉讓住宅避稅研究》，揭發大量物業投資者及外地買家一直透過轉讓持有住宅的公司股權方式炒樓，避過所有物業印花稅辣招，炒貴哂香港啲樓，令「用家主導」嘅房屋策略完全失效。由一眾官商權貴、地產大亨組成嘅團結香港基金，其實都用開呢道後門炒埋一份。
該基金會成員理事何超瓊及參事陳經緯，被我們證實近年分別利用「連殼買樓」方法買入山頂道2個獨立屋及賣出赤柱舂磡角道5個獨立屋，大拿拿將近10億嘅潛在稅收「袋落褲袋」。兩人本為中港地產商核心管理層，有極豐富的炒樓經驗，再透過「股權轉讓」繞過高達30％的買家印花稅及雙倍印花稅，令本身打擊炒家嘅樓市辣招完全失效。
「連殼買樓」漏洞亦將高達30%的稅率變成炒家的提價空間，進一步推高整體物業市場樓價。呢三成潛在稅收本來可以用嚟起多啲公屋居屋，解決劏房問題，就因為政府一直唔肯堵塞呢個炒樓漏洞，令公帑變成炒家嘅額外紅利，帶來嘅經濟誘因勢必吸引更多投資者用呢招炒埋一份，最終令樓價越升越高。
更加重要嘅係，珍貴房屋資源因為「連殼買樓」而不斷流失至炒家手上，大大削弱政府增加房屋供應的成效，情況猶如房屋市場「水喉漏水」。根據政府資料，單單是過往6年已經有近17000單交易是以公司身份買入單位，相當於同期新增住宅單位近20％。《富稅難收》亦發現西九凱旋門有近4成單位正以公司身份持有，呢啲單位未來都可利用「股權轉讓」漏洞賺取額外紅利，是即將流失的房屋資源。
《富稅難收》發現過往幾年126宗「股權轉讓」個案，已令政府損失近百億公帑，金額相當於全港76萬公屋戶未來5年加租10％嘅金額。假若政府仍拒絕倣效國際稅務改革經驗，向股權轉讓交易徵稅，堵塞「避稅後門」，不但會繼續令樓市辣招形同虛設，更鼓勵更多炒家藉此炒樓圖利，竊取原屬普羅市民的公帑，令房屋市場繼續成為炒家樂園。
所以話，點解有啲人咁想填多幾多個「東大嶼人工島」出嚟？就係想起多啲、炒多啲、賺多啲，轉移視線，你估真係輪得到我哋上樓咩？