立即捐款

鍾劍華

理大應用社會科學系助理教授/理大社會政策研究中心主任 網誌

政經

咁簡單的道理,講出來是要侮辱誰的智慧?

咁簡單的道理,講出來是要侮辱誰的智慧?
廣告

廣告

幾時開始,請某個人演講,就係表明完全接受他那一套的?如果係咁,重使乜請佢返嚟講,自說自話就可以了,所有交流,所有溝通都沒有必要了。

咁基本、咁簡單嘅道理,可能剩係得梁振英及林鄭月娥之流先至會扮唔明白,他們其實只是想乘機搏懵。當然還有那個所謂外交部,全部都只係混水摸魚。他們都只是想用盡每一個機會製造話題、製造事端,目的就係要打壓香港人的言論自由、打擊新聞自由、破壞香港的法治。

請個陳浩天去解說一下佢心目中咩叫做香港民族論,就係提供一個平台俾佢宣揚港獨?乜咁抬舉佢。日日電台電視台都播住話國家發展前景光明、又話民族復興,如果咁簡單,仲駛乜咁在意搞唔搞國民教育?仲有人會唔愛國?又話侵侵遲早跪低、又講到共產黨幾咁永遠正確,林鄭月娥又用盡每個機會擦鞋,講到習近平咁英明神武,又唔見習總及其他京官夠膽唔使保安行入旺角?仲使用成隊近身護衛圍住,又要將啲示威者隔開三公里?

依家那些官員,建制派議員及黨派,及一眾挨住個權力體制搵食揾位揾著數嘅人,佔用了幾多公共空間?電台的大氣電波時段已經越來越多被這類人或組織佔用,報紙的評論,有幾多不是建制派的?外國記者會當然有搵民主派去午餐演講,但相對而言,搵官員搵建制派搵那些精英階層的次數更多,內地官員也唔少。搵到陳浩天這些人物,真係偶然到好偶然。而且,主要是因為政府要搵民族黨去開刀,才令陳浩天的新聞價值突然急升。

今天,香港公共機構的管理層、各級諮詢委員會、法定組織的成員,絕大部份的其實都係建制派,點解又唔見得香港人個個都相信「一國兩制港人治港」真係好成功咁落實到?俾民族黨講多幾次乜叫香港民族論,香港人就真係個個都會支持港獨?這種言論是太過睇得起陳浩天,還是政府根本也睇唔起自己,又或者是政府當香港人個個都係傻仔?

其實都幾矛盾,一方面就以為人多疊馬就可以壓倒少數,可以把歪理變成真理,可以把謬誤變成事實。但另一方面,一個蚊型過蚊型嘅組織,就可以被描繪成為洪水猛獸,講到俾佢噎多一句,就話會推冧成個太平山。

一個亳無理念、完全無認受性的政府,就只能用同一個理念或同一套邏輯來作雙反雙矛盾的解釋。只有嗰啲冇思辨能力的,才會被這一套盲官黑帝的邏輯迷惑;只有那些用個pat pat 來當腦袋的人,才會甘心情願作建制派的打手及五毛。呼應這種思維方式來喊打喊剎的,無論是大學校長也好,所謂專業精英也好,尊貴的議員也好,其實全部都是博亂尋租的政治投機份子。

說到底,港獨這個平台是誰製造出來的?還不是梁振英!製造出來之目的,就是要豎立一個政治稻草人,利用港獨作為破壞一國兩制港人治港的切入點。香港政府及北京當局,以至梁振英這一流人,用這一招已經用得太濫,仲可以呃到邊個?

外國記者會竟然給出一個這樣根本唔使講個個都知的作回應,驟眼看似是有辱外國記者會及所有還懂得用腦的人的智慧。照計這個會冇可能咁低水平。不過小心玩味就不難明白,這樣的回應,就如同懶係煞有介事咁強調你阿媽係女人,真正的作用不是要解釋或尋求諒解,而是要侮辱一下梁振英林鄭月娥這幫人的那一種獨特智慧,說明這幫人有幾無聊,其實可能都是幾高招的!

廣告