以董建華同一干中港地產商為首嘅「 團結香港基金」，近日力推2200公頃超巨型「東大嶼都會」填海方案，面積相當於半個九龍半島。就算用佢地聲稱「多快好省」嘅方式施工，成個填海工程連基建都要4760億，仲要戴晒頭盔話係按現時造價估計，將來可能有變數喎，即係預咗超支再攤大手板問市民攞錢啫！
自從特首林鄭月娥7月初打晒開口牌要填海，陸續就有好多「專家」、「工程界人士」走出嚟話填海幾快幾平幾方便，啲數越吹越勁。有人話快到三、四年就填好，有人又話成本只係$500-900蚊一呎。喂，政府 土地供應專責小組 Task Force on Land Supply都話至少要11年、填海連基建$1500-2500呎喎。咩專家咁巴閉識得哩啲神奇填海大法？
只要睇真啲，就會發現哩班「專家」係出於自身利益而講啲唔講啲。好似哩幾個月成日走出嚟話填海好平嘅「利基控股」主席單偉彪，本身就狂接填海同基建生意，例如機場三跑同東涌新市鎮擴展的填海工程、高鐵牛潭尾至大江埔隧道、沙中線、中環灣仔繞道全部都有份，仲有好多土地平整同政府基建合約，成功填海一定好多嘢撈。利基控股的2017年報都講到明：「因為預見土木工程的減少，集團更有迫切性需要擁有長期穩定收入的業務，來平衡工程行業的波動。」等開飯嘅食相真係好明顯。
單偉彪講到填海好平，每呎只係$500-900，但睇返佢引用為例子既東涌填海工程文件，哩個講法根本係取巧，只計咗建造海堤同填土工程的116億元，於是得出每呎不過$900的價錢。實際上填海造地並唔止圍起個海然後倒泥就成事，仲有建渠、排水進水口等基礎建設、緩解環境影響措施同工程顧問費，成個東涌擴展的130公頃填海，係問納稅人拎咗205億架！相當於每公頃$1.58億、每呎$1465。仲未計接駁去填海選址的道路同交通工程成本。
最諷刺嘅係，單偉彪兩年前接受訪問時明明自己話：「若是根據現時狀況來評估未來工程項目所需款項，申請撥款的款項肯定不足。」以解釋基建工程經常超支的原因。（星島日報，2016.3.28）。而家就用啲過去工程例子講到鬼咁平，總之拿拿林氹咗市民落搭開工先！
除咗利基控股可以受惠於填海基建大茶飯，單偉彪亦係「路勁基建」的主席，該公司主要在中港各地經營房地產，「粵港澳大灣區」是集團其中一個發展重心。「東大嶼都會」一旦落實，打通大灣區一小時生活圈，利基就可填海做基建、路勁就負責起樓賣樓，真係發過豬頭！
再追索上去，利基和路勁皆由「惠記集團」持有，是單偉彪和單偉豹兄弟的家族生意，「惠記」的另一主要股東係「新創建集團」，即係「新世界發展」附屬公司，而新世界主席鄭家純就是團結香港基金副主席。兜一大個圈，所謂「填海專家」其實同團結香港基金圍威喂，怪唔得團結香港基金出動佢地既分身「 政策．正察」facebook專頁去推單偉彪個填海訪問啦～
近年香港啲基建工程鑊鑊新鮮鑊鑊金，連一條沙中線都搞唔掂，仲想我哋應承俾4760億填個東大嶼人工島？成日用住大啲、住好啲嘅名目打劫香港人，真係狼過祈福黨呀！