亞運男足揭幕戰，香港以3比1勝老撾，雖然係揭幕戰，但由於印尼球迷對呢場波冇乜興趣，就算有啲興趣都因為波飛太貴而止步，所以得好少人入場，其中一個銷售櫃檯賣咗唔夠20張波飛，接近2000位警察、軍隊學員及中學生被強制安排入場充當為臨時觀眾。
同一時間踢嘅一場印尼乙組聯賽Madura FC對PSS Sleman吸引一萬人入場，完全同亞運男足係兩個世界，大部分印尼人只對自己波上心，另外就係上面所講，太貴，Madura FC對PSS Sleman最貴嘅一張飛只需35000盧比，最平15000盧比有交易，但亞運波最平已經要75000盧比，睇印尼隊就冇計啦畀你啦，但用75000盧比去睇香港對老撾？真係冇幾個印尼人會肯，呢個就同你香港搞亞運一樣（比如），揭幕戰由老撾對柬埔寨，戲碼已經WFC，仲要波飛定價三款，800、600，最平300蚊，你睇唔睇呀？
由於比預期冷清，Bekasi市政府已經向5,000名學童分發免費波飛，好可惜有好多人對場波冇興趣冇入場，媒體REPUBLIKA.CO.ID報導訪問其中一位學生Amel，佢話「如果是我們的印度尼西亞國家隊正在比賽，那就更令人興奮了」，另一學生Rika話「分配系統從每個班級中選出10名代表，但沒有幾多人對這場比賽有興趣，缺席了本次比賽的持票人非常多」。