立即捐款

社運

將軍澳青年落區 轉化雨傘革命力量

將軍澳青年落區 轉化雨傘革命力量
廣告

廣告

將軍澳青年力量三名社區主任張偉超、張鳳嬌、陳緯烈

(獨媒特約報導)2019年是區議會換屆選舉,今次選舉與上屆2015年選舉一樣,續有一班曾參與2014年雨傘運動的年青人,盼在社區延續這場運動。

將軍澳青年力量成立於2015年,目前有三名年青人以社區主任名義於地區服務。張偉超、張鳳嬌及陳緯烈三人都是將軍澳居民,分別任職眼鏡店、社工及護士。三人分別於「景林」、「富藍」及「彩健」服務,「積極考慮」參與下年的區議會選舉。

張鳳嬌指,將軍澳青年力量因雨傘革命而成立,「雨傘革命之前有啲人可能都有留意時事,但就唔知點樣去參與。雨傘革命係一個動力,去將一啲理念或者一啲意識應用喺社區度做。」於是他們認為社區工作夠「落地」,故決定在地區延續雨傘革命為香港帶來的公民覺醒。「大環境好難改變,但喺小事上我哋就相信有能力去做。」

將軍澳青年力量成立初期,便將工作範圍收窄至區內小範圍的區域。張鳳嬌指,他們「冇可能做曬咁多區」,而定點工作亦有助於與街坊建立關係。

後生仔落區,面對的困難都是居民街坊「信唔過」,陳緯烈亦表示將軍澳青年力量「俾人第一印象會冇咁成熟」。張偉超則坦言他們雖然「零經驗」,但會「將勤補拙」,以獲得居民信任。張鳳嬌則認為「本身社會嘅大環境對年輕人有一定嘅既定印象,覺得係出嚟搞事同埋會反叛啲,唔了解可能會有啲抗拒。」

他們三人均早於去年開始服務社區,一段時間過後,張鳳嬌指居民了解後「態度有唔同」,「我本身唔係住富藍,啲街坊本身唔識我,但慢慢到見到我會叫我個名同我打招呼,會覺得好親切。」「同埋佢哋都會鼓勵你,講加油。」「試過有一個街坊自己煲咗湯,佢就攞個碗裝落嚟畀我飲。我覺得哩個婆婆好慈祥,我都完全冇諗過做地區工作會有哩啲嘢。」

另外,張鳳嬌亦表示資源為將青力的其中一個困難。張鳳嬌指,將青力因資源問題難以進行衡常活動:「因為我哋係冇任何政黨背景,完全係自發自費咁做緊,所以好難有太多衡常嘅活動,視乎好多情況。」張偉超補充指,舉辦社區活動受不同因素影響,「試過排一季都排唔到個場」。

34046938_568228200229425_5379776804045193216_n
張鳳嬌落區的「富藍」,常遇對手義工以各種手法「反包圍」。今年七月,她在 facebook 上指自己的街站遭對手民建聯的義工以帆布遮蓋,最後需報警處理

雖然於經驗及資源方面有所不足,但張偉超則認為將青力能為社區帶來新意。他表示,將青力的優勢為較有創意,例如他們舉辦的驗眼及漂書,有別於較傳統的社區活動。對於漂書活動,張鳳嬌指,舉辦是希望讓街坊多關注社區,並參與其中:「其實喺漂書嘅過程中,街坊好簡單過嚟擺低或者拎走,都係一種參與。」

居於當區景林邨的張偉超指,自己於雨革後留意到「原來自己邨都好多問題」,所以「企出嚟」。「同啲街坊朝見口晚見面,佢哋會需要你出嚟幫手」,張偉超笑言自己有「被需要」的感覺。他希望以地區工作連結社區鄰里,令街坊「參與其中」。他又指景林邨有不少無助的獨居長者,希望自己可幫助他們。

陳緯烈則稱,落區後發現街坊日常遇到的困難多樣化,「原來街坊啲問題可以好刁鑽。例如佢哋可能唔識填表,又唔知去邊度搵人幫手。」「或者冷氣機滴水,但唔知可以有咩渠道搵幫手。」居民因日常瑣事求助,反而令他體會最深。

38208437_621853584866886_1266052721299947520_o
陳緯烈於街頭設街站,舉辦不同活動

2015年區議會選舉,「景林」的原民主黨區議員,以2,707票僅敗於獲2,878票民建聯的温啟明。「富藍」同樣是由民建聯陳博智以不足一百票的差距,以2,207票對2,113票擊敗將軍澳民生關注組的陳耀銘。「彩健」方面,被視為中間票的何民傑以2,873票擊敗獲1,791票的民建聯吳東河。

記者:王沛嘉

廣告