一般嚟講政治嘢都少寫，又唔係我怕政治，我怕你心靈受唔起啫。無論如何，今次講高鐵，都主要講金融財務之類。真係金融財務咋下，唔係掛羊頭賣狗肉扮技術文然後抽政治水。
首先，咩人流預測大跌呢啲，預咗啦。 「全世界都係咁」。同樣地，啲咩 「3年後更升6倍，盈利達14.18億元」，都係笑下算。寫嗰個三年後仲畀你搵到出嚟嘅機會，一定細過我估錯然後要出嚟認衰嘅機會咯。你咪睇下三年後咩情況。
但，認真便輸了啦。呢啲咁嘅預測，笑下算。你睇啲分析員報告都係咁上下。新股招股書啲預測都係咁上下，有幾可會做得到？等於男仔為呃女仔上床（或者結婚啦，一樣啫，張愛玲話婚姻都係長期賣淫），有乜講唔出？道友師傅到要拎錢，有乜做唔出講唔出？
不過有樣嘢, 明報呢篇報導就錯得很，而我好似冇乜見人出嚟講。唔知係陳帆講錯定明報理解錯，但我相信係後者，因為其他報紙好似冇呢個問題。
係乜？
大佬，EBITDA唔係 「盈利」咯，好冇？
明報的圖
就當估啲數啱，個圖（同埋份文件）擺明就係話EBITDA兩億。唔知點解去到明報變咗 「兩億」盈利。
呢兩者，就真係爭好遠啦。好似話你知你五年收入畀得起首期咁。但，唔撚使食咩！
EBITDA，中文.....講你都唔識架啦（OK，稅息折舊攤銷前盈利，你真係覺得應該用中文？）。英文呢，咪Earnings before interest, tax, depreciation and amortization.
Amortization對於非金融人嚟講有點煩，暫且不講。但另外三樣都唔係極難理解嘅槪念。你話EBITDA兩億，我就問：唔撚使交稅？（蝕錢的話又真係未必要，分分鐘有得回贈），唔撚使畀息？唔撚使折舊？
稅，其實分分鐘真係唔使理住（反正都冇錢賺，畀乜鬼稅？）。但利息同折舊呢？偏偏高鐵唔係搞網站，固定資產多，折舊必定大。同埋高鐵必然係高負債，利息開支實多。呢個普世價值，唔係中國特有。
嗰時講過，成日恥笑啲友卡片印自己乜乜乜碩士—即係話畀人知你冇博士咯（例如我，但我冇印自己係MSc ），同樣地，你印FRM咪即係話人知你考唔到CFA（姑勿論官方點講或印嘅人點講，我肯定在中環一百個人一百個都咁諗）。
舉一反三，你寫得自己公司係乜乜行業七大，咁肯定係第六或第七—否則你就寫五大啦。某年（都好多年前，所以可以講）我去中銀香港(2388)業績會，佢哋派份PowerPoint，第一版就寫收入創新高 — 當時相當睇好中銀香港嘅我，就知今次仆街了。因為咁樣寫得，即係盈利倒退咯！
所以，蔡東豪話齋（唔係佢發明，但我由佢度睇到），EBITDA又名Earnings Before I Tricked The Dumb Auditor。EBITDA唔係盈利，正如齋燒鵝唔係燒鵝，賽螃蟹唔係蟹。但凡有公司講EBITDA點點點嘅，即係盈利必然唔好睇。
蔡東豪另一名句：不如下個月你拎EBITDA交租丫？對，EBITDA不能拎嚟交租，亦不能拎嚟派息。
所以，兩億EBITDA就肯定唔係兩億盈利。我見其他報紙好似都冇咁寫。
不過話說回頭，又真係有咁嘅讀者咪有咁嘅作者（我話我），有咁嘅群眾咪有咁嘅政府。其實真係唔使執著於咩高鐵蝕錢 — 全世界邊撚條高鐵唔蝕錢呢，可？邊個話你知高鐵會賺錢？
懶搵好詳細嘅資料，但就我理解，全世界頂多得三四條高鐵路段係賺到錢嘅。法國巴黎—里昂。日本東京—大阪，日本東京—福岡博多。同埋傳說中嘅中國北京—上海京滬線。
我亦冇深究，到底佢地只係EBITDA break even，定真係畀埋息都有盈利。但我幾肯定嘅係，就算真係有盈利都好—都係把撚的。連個cost of capital都冚唔到。即係絶啲講句，你高鐵咁大投資，我拎晒舊錢去買美債收三厘息都大把 「利潤」啦。
而即使呢啲路段賺到錢，以全國嚟計，高鐵度度都蝕錢，無一例外。如果只係話咩中國專制大白象嘅，你又解釋唔到起高鐵果啲民主先進國家，一樣起，一樣蝕到趴。
而我亦幾肯定，呢四條所謂賺錢嘅高鐵線，都仲係搵笨實的。日本就不用講，利息咁低，變相找少個I，而T都一般唔使點畀（都話冇乜錢鎌）。中國一路數據易造假，二來幾明顯國有銀行畀低息融資，先整到有錢賺—反正都係阿爺左袋右袋。法國就真係唔知啦，但我估都同啲工會勢力強，飛機又貴，變相高鐵都可以貴有關。
睇到尾先發現原來梁繼昌有講到
利申：我係明報多年讀者，科嘅水我估多過任何一個讀者。因為我又買實體又訂電子。我同不少明報記者都相熟（上埋床都有添，但陳年舊事啦）。而呢篇唔知邊個寫。如有得罪多多包容。但都係就事論事，兩億EBITDA就唔係兩億盈利咯，大佬。