立即捐款

仙道彬

《蘋果》體育專欄作家,情迷NBA,執着本地籃球,最愛落場打波。 網誌

政經

離地還要強加於人

離地還要強加於人
廣告

廣告

昨晚搭地鐵,見到個廣告牌,上面係關於學生資助辦事處的資料。記得讀大學時因為生活需要,申請full grant full loan,一年大約有八萬幾蚊左右,交完學費,再加補習同教波,夠使有突,仲成日有錢去旺角買書。呢筆錢,係我咁大個人接觸過最多的現金。因為真係試過攞出嚟存入銀行,但都唔夠十萬蚊。

劉鳴煒今次又出來分享理財心得,可以話預咗俾人插。呢個十萬蚊現金,同每日數銀紙的分享,失禮講句,到而家咁大個人,我都未試過數10萬紙現金,亦未試過有夾萬。其實重點唔係呢樣,亦唔係佢收咗筆錢半年,一蚊都冇用到。

而係劉生細個因為鍾意,可以想買油畫(雖然最後因為劉生嫌貴冇買),咁嘅家世,莫講話十萬啦,十億都唔使用喇,因為劉生阿阿爸阿媽係咩人先得架。

簡單問句,有幾多人試過十歲仔,兒童身份證都未有,就收10萬蚊做生日禮物(仲要係1990年,當時買個太古城單位,都只係百幾萬,十萬真係夠首期)?

正如一個有幾萬人追的女神,同你講有好多男人追都唔動心,點解?因為佢根本未驚過。不愁衣食,不知疾苦,衣食豐足,我都唔使用啦。你話冇飯食,冇租交的話,一千幾百都即刻攞去用啦。

理財,係咩意思?係你賺十萬返嚟,點樣儲,點樣投資,點樣對抗物慾;但係,sorry,當一個家庭可以用十萬蚊俾個小朋友「玩」,呢個經歷,就算劉生言之成理,都恐怕好難聽得入耳。其實佢入面有不少部份都好有道理,亦都有鬧政府監管理力,但一用自己做例子,就出事了。

人最可怕,唔係離地,而係當你的地面高人幾十呎,仲要強加於人先得人驚。

題為編輯所擬

作者 Facebook Page

廣告