立即捐款

費特

生於香港,長於澳門,愛用鍵盤說三道四的自由寫作人。 fb : www.facebook.com/fredmacau 網誌

政經

有啲嘢,連Package Lau都做唔到

有啲嘢,連Package Lau都做唔到
廣告

廣告

香港老友A君與父母今早來澳,準備出席澳門親戚今晚的婚宴,襯中午的lunch break,我倆相約在氹仔某餐廳午飯。到餐廳時,A君已坐低,一個人玩緊手機…

「喂,咁早到呀?」我話。

「咁岩係附近嘛!岩岩去左金光大道,冇黎澳門幾年,又多左幾間新酒店。」A君把剛才跟父母的合照給我看,背景是今年年頭開張的MGM Cotai。

「世伯身體幾好嘛? 唔叫埋佢一齊黎?」A君爸爸幾年前做過大手術,身體一直麻麻。

「都可以啦,起碼仲出到門過到黎澳門。有問過佢黎唔黎同我地食lunch架,但佢都約左啲澳門friend。」

「咁咪好囉,幫我問候下佢老人家。係喎,上次你話睇緊樓,買左未?」我問。

「未呀,儲鬼到首期咩。」

「聽Package Lau話,去少幾次日本咪儲到囉。」我講笑地說。

「屌,唔好講呢條離地仆街,今日又有新聞。」A君把手機遞給我,螢幕顯示著《劉嗚煒:10歲生日收10萬現金,一元也沒花,全部存入銀行》的大標題。

我懶得看內文,就回應話:「離地還離地,你又真係吹佢唔漲,人地老豆係大劉,身高1米8,個樣又唔差,名都有得你叫Package Lau,成個package贏曬啦。」

「樣唔差?成個徐步高咁喎。」雖然真係似似地徐步高,但明顯A君這番話,只是無奈中的一點安慰。

「似徐步高又點,起碼好過你個鼻大到成個成龍咁。算吧啦,人地投胎投得好,你有邊樣野好過佢?」本來想藉此轉話題,因為真係無興趣繼續討論呢個二世祖。

兩秒後,「唔係喎,有樣野我今日已經做到,但佢有錢都一定做唔到。」A君仍糾纏於呢個topic,我唯有敷衍地問:「乜嘢咁巴閉呀?」

「同老豆過黎澳門囉。」

呢句,真係駁唔到…

作者 Facebook Page

廣告