立法會發展事務委員會特別會議（2018年9月19日）
我係香港專上學生聯會代表會主席張倩盈。
過去一星期，學聯嘗試籌備一場專屬於大學生嘅土地供應論壇，原本計劃聽日舉行，誠邀土地供應專責小組出席，可惜土供組問完一大輪論壇詳情，包括嘉賓、籌備情況同內容分配之後，先決定佢地有日程問題出席唔到。
我知道呢次我地搞論壇係搞得好急，因為我地後知後覺，太遲發現大學生喺土地供應嘅討論入面，未把握好自己嘅角色，結局係淪為操控對象。睇返土地供應專責小組嘅網頁：「專責小組將舉辦一連串公眾參與活動，包括巡迴展覽、公眾論壇、工作坊、社區外訪、青年分享......」分享？點解公眾就係論壇，青年就係分享呢？我上網查「土地供應 青年」，查到嘅除咗有圖無字嘅中學生交流會之外，重有「香港政協青年聯會」榮獲黃遠輝主席應邀出席諮詢會，同聲同氣支持填海；「工聯會青年事務委員會與土地供應專責小組意見交流會」亦係支持填海。
圖片來源：港區省級政協聯誼會網頁
原來早喺2015年3月，時任行政長官梁振英就喺一個所謂「青年高峯會議」上面表示，政府喺開發土地嘅過程中遇到唔少反對聲音，話有人叫佢「呢道唔准碰、嗰道唔准起」，土地改劃用途又遇到司法複核，於是呼籲青年發聲，喺輿輪上幫佢加快進度。
圖片來源：政府新聞網
2018年4月，民建聯創黨主席曾鈺成喺專訪透露，有一啲民建聯區議員因為考慮市民利益而反對政府嘅發展計劃，相信政府邀請佢加入小組係希望佢擺平反對聲音。
結合以上兩件事我地可以發現，「擺平反對聲音」，就係「青年」呢個身份喺土地大辯論入面嘅角色。政府為我地安排嘅角色，係一班對前途好灰、無辦法向上流動嘅、急需政府不擇手段破壞環境、毀人農地去起一百尺都無嘅所謂上車盤畀我地住嘅人。呢個角色重要係用完即棄，利用「青年要有未來、要上車」嘅藉口去拎到1200公頃嘅地之後，公屋又唔係起得多，又要用地嚟滿足啲失敗嘅創科計劃，又要起豪宅，又無解決過炒樓問題，最後青年都係淪為權貴嘅玩物。
我誠切希望香港嘅大學生未來可以同香港專上學生聯會一齊，把握返我地嘅角色，堅守公義，喺重要嘅、涉及未來幾十年香港命運嘅社會討論當中，主導返屬於我地嘅聲音。