之前應承左一個訪問，雖然尋日發生左好大件事，但始終之前約左記者朋友，趁今朝尚有空檔就快手手應約。記者問我去到依加有無擔心過自己的出路，我即刻大笑左好耐，因為諗一諗，真係未諗去向，因為我地兄弟姊妹面前仲有一場仗未打完。
記得當年，我地爭取到退休年齡延至65歲，當時真係開心到爆炸，因為可以同大家同事一齊享受自己爭取返黎嘅成功果實，無諗到有一日大家竟然會面對咁不人道嘅對待。不過，就係要遇到呢啲事你先會知道，即使我地遇唔到一個好既老闆，但起碼我地可以擁有一班好同事，去到呢啲關頭，你就會知邊個係真正嘅朋友，就算可能平時「斯斯縮縮」都好，但係走到抗爭最前線，大家就係最堅實既戰友。
英國同事其實覺得我係一個癲婆，以前搞復職、搞歧視職工會，搞到以前律師都怕左我，因為明明條例係寫左無得復職，但我都會去試，爭取談判，到最後我真係復職呀！我一路都相信，最重要唔係成唔成功，係起碼我地去試。人地話點解我成日都贏，其實，只係我輸既時候大家睇唔到。
想贏？知唔知有咩秘訣丫？就係要識輸囉。
我地無做錯到任何嘢，今次僱主越係想快刀斬亂麻，我地就會越硬淨咁去反抗，我地每個同事都會係咁。因為我地英航工會成班同事，係 Always Fight Mode！！