立即捐款

陳劍青

本土研究社成員,經營民間地理思想,關注城市空間問題。 網誌

政經

土地真相——一個未完成的行動

土地真相——一個未完成的行動
廣告

廣告

儘管日日電視報紙都見到你班政治PR、基金佬、地產佬同打手,每日都用唔同方法登Facebook 廣告sell香港話缺地、缺地、缺地。但世界既真相都係只有一個,香港土地問題既本質,係唔會因為你不斷話短缺就會由夠地變左唔夠。

香港市民生存空間長期被擠壓,普遍都會覺得好缺地方生存,係好正常既事。依家講緊既問題係大家缺幾多、邊個缺同點分俾缺既人。

而你班官員就話唔好理呢啲問題,總之就缺,造左啲地先再講。你做規劃做到咁盲目,咁大家點信得過你,造完啲地係會分到俾有需要既人手上,而唔係益左大灣區、工程佬同地產佬呢?

點解話唔夠地根本只係你造出黎既假象,就係因為我地花左好多精力讀通哂你成盤數,先發現原來你假設啲房屋用地以後都係繼續起啲好似錦繡花園既極低密度私樓,7成都係預黎起中低密度呀。

而用黎同大家平時需要冇關既「特別設施用地」(又想攪邊科?)又話未來要幾百公頃,討論左咁配,到今日都唔知你搵番黎係起多個高球場定迪士尼呀。

經濟啲地既需要又重覆計算,又話咩一帶一路有好多甲級商廈需求,亂咁估,俾你填哂成個維港起哂商廈俾成條一帶一路好唔好?

單係減走哂上以呢啲水分,就已經減走差唔多成千公頃既假土地需求,根本條數已經唔再缺!

當你再解釋唔到落去,然後就話,其實,香港人都想住大啲,做多啲出黎都可以儲著先......

咁你講哂啦! 想幫香港每人都住大啲,又唔見你去立法將全港住得細既人優先起俾佢地住大啲?? 你地冇呀,虛偽,一味只係玩民綷拎劏房基層既苦況出黎賣弄,做你地想攪填海工程同公私合營既理由,你唔覺得自己好可恥?

除左土地需求方面,土地供應方面就刻意隱藏、貶低同DQ啲選項:包括將明明10年內就可以全面規劃同善用既棕地(760公頃)、私人遊樂場契約(300公頃以上)、地產商囤地(1000公頃),全部既發展潛力都打左大折扣,話短中期只係用得15%咁大把,刻意貶低用現有土地解決問題既潛力。

俾十年時間你收地、重置,你話只係攪到15%???有冇人你信呀,你同地產商擠牙膏式供應有咩分別呀???

重有我地近日做個份《隱藏選項》,揭示左一早就俾土供組DQ左個堆未善用官地,原來都有成301公頃,又喺個選項清單消失左!

造大需求,估底供應,計出黎咪缺地囉,唔係點先昆到小市民去揀填海同公私合營,林鄭你心目中最想做既選擇??

其實,我唔明呢班友成日口講務實,點解一直都咁唔務實,你冇咁大個頭就唔好帶咁大頂帽啦,依家話冇地,原來你重要計以後繼續起啲低密度豪宅?根本只要好好善用同規劃手上既土地資源,已經可以滿足到大部分既城市需要。

所以,同啲官討論左咁耐,我既結論係從頭到尾你地根本只係借場土地大辯論過橋,諗著權貴既生活基本不變,窮人立錐之地都冇,你地就繼續保留粉嶺哥爾夫球場,保障地產商工程利益繼續賺大錢,普通市民繼續幫佢供一世樓。

你地班委任動物重要好自滿咁講,話土地大辯論終於教育到市民真係缺地啦,講白啲,根本就係一個洗腦工程。而當中有唔少傳媒同專業人士都係共謀,重要好虛偽咁走出黎話幫市民造地解困,又唔少市民又真係信左條賊船。

就此公開宣告,雖然政府set既土地大辯論諮詢已經完結,我地都消耗左好多人力同資源,但我地係絕對唔可以俾個土地真相埋沒,最後最開心既就係團結香港基金背後成個地產工程利益集團,犧牲既就係市民既公帑同埋困擾一輩子既住屋問題!

指出土地問題的真實面,本身就是一個未完成的行動,就由大家一齊將它完成吧!

廣告