立即捐款

煙士打淫

麥浚龍的歌,崑南寫散文,黃子華棟篤笑: 情色文化無處不在,最緊要係,佢在你腦海。 網誌

生活

林奕匡:不需要理由

林奕匡:不需要理由
廣告

廣告

香港樂壇出左粒新星:林奕匡。記得第一首比人唱到街知巷聞嘅歌係:高山低谷。

「站在樹林內就如沒氧氣,在夕陽下寂寥吧沒權利見你...」、「幾多人位於山之巔俯瞰我的疲倦」、「只適宜滯於山之谷整理我的凌亂」mv當中,佢企喺山林前面,唱住和美嘅歌聲。

自然與人文故事出奇地夾,融和喺一齊,互相映襯,有種舒服嘅和諧叫林奕匡。

另一首令我震驚嘅歌叫《草原》。「成為我的草原,成為我的小天使,無暇兜兜轉轉,我唯求天空清朗點...」

成為我的草原即係點?我從來無聽過啲咁深奧嘅比喻,啲人只會話似花咁香艷。

我帶住疑問去loop呢首歌。「成為我的草原......」我慢慢明白,男人最後需要嘅唔係稍縱即逝嘅花卉,男人要嘅係任佢馳騁嘅草原:廣闊、無垠,包容。

只有草原係最舒服,只有草原能夠容納我的狂或野。只有草原。

最近新一首叫《生之頌》,頭兩句已經係一個和諧嘅自然世界:「剛孵出的鸚鵡,剛生出的一串禾草」

佢嘅一切,都好年輕,就如初生之犢單純,未被世界污染。

記得好耐之前,我聽佢第一首歌叫Goodman,當時嘅佢唱得輕佻,一首男人自詡goodman、向女人hardsell嘅歌。”I’m your goodman信譽好你話到我照做,人地去食煙飲酒我沒有羨慕” 呢首歌太油膩,完全埋沒左佢。

在此,恭喜林奕匡終於搵到自己嘅路,繼續去啦,繼續走你嘅清新路線,繼續保持你嘅純潔。

林奕匡嘅歌,好多都唔需要理由,淨係聽住佢嘅歌,都覺得自己擁抱緊大自然。天真單純,又唔需要理由,點解堅信「安徒生」?點解相信要「忠貞做人」就會「得到蒼天的護蔭」?點解佢知「一雙手只要握成拳頭能捱下去」?呢一切,唔需要理由。

我地樂壇正正缺乏一個林奕匡。佢紅起來,因為佢嘅出品都係世界級。尤其是《草原》入面合唱團嘅高亢嗓音,完美同林奕匡結合,將首歌昇華到另一個層次。

林奕匡單純自然,正正係我地社會一直缺乏嘅野。佢紅,我諗唔需要理由。

「快成為我的風花雪,陪同我飛,離繁囂都市百丈遠,駕霧騰雲沒一點污染。」

廣告