好有錢狂落廣告宣傳「健康大使」嘅九龍社團聯會，原來仲關心埋中華白海豚嘅健康！尋日佢哋開記招回應施政報告，之唔係又出來撐填海。不過為撐填海，九龍社團聯會理事長王惠貞竟然講到港珠澳大橋建成後，「按佢哋嘅調查，中華白海豚嘅數字冇少咗，反而多咗」。吓？按邊個嘅調查得出咁嘅結果呢？
事實上，據漁護署每年委託海豚專家洪家耀博士做嘅《監察香港水域的海洋哺乳類動物》報告，中華白海豚於大嶼山西南、西、西北及東北四個調查區域嘅整體數目，由2011至17年度分別為88、80、73、87、65、 47 及47 隻。四個調查區域合共整體海豚數目，錄得明顯下降趨勢。
而港珠澳大橋香港段工程大約2016年完成，三跑填海工程就緊接開展，對海豚活動範圍嘅影響無停止過。報告亦提到過去十數年香港水域中華白海豚數字不斷下降，情況令人憂慮。真係唔知點解九龍社團聯會咁有信心同公眾講港珠澳大橋建成後中華白海豚數字仲多咗，唔通佢哋識搵啲連政府都唔識嘅海豚專家做調查？定係有人為撐填海，捏造事實誤導公眾？