分享是次施政報告兩組靈異數字——
統計處推算香港最高人口增長：88萬
東大嶼都會預計人口：110萬
香港長遠土地短缺：1200公頃
東大嶼都會填海面積：1700公頃
至於最恐怖嘅數字就連佢都唔敢提：幾錢埋單？
昨日我哋預早分析施政報告土地房屋政策五大地雷（傳送門），幾乎全都不幸言中，唯一估唔到嘅係，東大嶼都會改咗個名叫「明日大嶼」，填海範圍就由之前講開嘅1000公頃，大幅擴張到1700公頃咁多，等於三份一個九龍半島咁大。但香港未來三十年的土地短缺只係1200公頃，究竟填1700公頃咁多做咩呢？如果話做土地儲備，統計處推算由現在至2043年高峰之間的人口增長只是88萬，之後人口就會回落，但單是東大嶼都會就可容納110萬人，咁係咪而家進行中嘅土地房屋發展計劃全都應該即時煞停，如果唔係東大嶼都會起出嚟就會變鬼城？
1700公頃哩個數，剛好就係「團結香港基金」提出「強化東大嶼都會」計劃2200公頃填海、同政府原本計劃1000公頃的中間數。再睇吓政府個最新填海範圍，成個形狀佈局變得同「強化東大嶼都會」幾乎一樣。
林鄭甚至連填海成本都改埋口。今年4月政府土地供應專責小組的諮詢文件明明話成本係每平方米$15,000-25,000，今日就由不具名嘅「當局」官員對記者講話係每呎$1,300-1,500（即每平方米約$13,000-15,000）【註1】。每呎$1,300哩個數好熟口面喎！之唔係早兩個月「團結香港基金」推「強化東大嶼都會」時聲稱嘅估計每呎成本$1,360?! 林鄭抄功課真係抄得好著跡！
要留意嘅係，以上成本數字只係講緊填塊地出嚟嘅造價，未計人工島在海中心，要興建三、四條跨海公路同鐵路嘅成本，每條千億起跳恐怕走唔甩。
睇到哩度真係想問，其實做咁多工程研究、可行性研究、土地大辯論、公眾諮詢大龍鳳做咩呢？只要由董建華牽頭、中港富商組成的「智庫」獅子開大口，林鄭就會即刻聽晒話，乖乖打開庫房配合哩個掏空香港的一萬億發展計劃，之前做嘅研究、資料、諮詢全部唔洗理。所謂好打得，原來只不過係老董的傀儡、打手。
對比以往新界東北發展區都仲會sell吓「香港人的新市鎮」（雖然係大話），今次的「明日大嶼」更是明刀明搶，講到明為咗連接大灣區，要將大嶼山打造成通往世界和連接其他大灣區城市的「雙門戶」。耗盡財政儲備、建設遠超香港人口所需的土地，只有團劫香港的一群中港地產集團同工程公司會是大贏家。近年香港已變成中資工程公司在亞洲的重要「產能消耗地」與「基建提款機」【註2】 ，大開中門貢獻國家。可以預期，東大嶼都會填海一旦成功開展，就寫下香港的終局。除了奮力反抗、或與人工島一起沉落，我們別無選擇。