立即捐款

生活

《無雙》(含劇透):野心夠大,但太貪心

《無雙》(含劇透):野心夠大,但太貪心
廣告

廣告

擺明劇透,最後警告,再睇落去唔關我事。我已經連subtitle同description都特登吉咗佢。

莊文強訪問有提過,話開戲時都有少少阻力,(大陸?)老細其實唔多鍾意呢啲扭橋戲,因為拍穿咗橋就冇人去睇。所以莊文強話想拍到係穿咗橋都好睇。

我認為佢失敗咗。《無雙》好唔好睇仲有得拗,但我好肯定穿咗橋就唔使睇!(留意《A Simple Favor 小心幫忙》我都有睇二次)。用呢個標準,你又可以話其實個劇本幾成功,至少佢(第一次,即係揭穿發哥身份時)穿橋時我覺得幾 wow,但掉轉頭,如果一早有人話咗我知,咁真係大半套唔使睇了。

有朋友未睇嘅,奉勸佢唔好睇任何關於套戲嘅介紹同評論。而家啲友(其實可能我都係)劇透咗都不自知。我就因為之前上咗維基百科就知道張靜初嘅角色,知道佢係整容後嘅秀清,就估到嗰部份嘅劇情了。

講返套戲,其實第一下扭橋,係好正的,有說服力,有戲劇效果。完場聽有人講「發哥係郭富城想像出嚟」,唔夠深入。佢亦唔係精神分裂。正確嚟講根本係兩個面相,你中有我,我中有你。亦都等於《蝙蝠俠黑夜之神The Dark Knight》講嘅:You complete me。

郭富城(李問)就係「初心」嘅自己,想像中嘅自己,或者係「佢想人睇到嘅自己」。發哥(畫家)就係「真實」嘅自己。冇咗畫家,李問餓死咗啦,邊得嚟咁多堅持初心。但到畫家有錢有女人,又開始懷念返初心,想像返一心追求技藝嘅自己,「我都係為世所迫,你估我想殺人?」。

大煞風景講句,有人話抄《非常嫌疑犯Usual Suspects》,我更加諗起王晶嘅《旺角監獄》(OK好睇的),或者係《神探》。

莊文強在訪問中有提到,其實亦等於我地上Facebook上Instagram咁,咩係真,咩係假?Facebook上面個個都美化自己,就正如李問講大話一樣。但我諗觀眾唔會向個方向諗。

好啦,呢度其實原本係OK的。朋友話,明明又話畫家好低調做乜又搞場咁嘅泰國大龍鳳炸到稀巴爛?我覺得呢度反而解到:「畫家好低調好小心」呢句嘢根本都不可信啦。但,泰北啲開槍戲真係過晒火位,畀人感覺夾硬要Mark哥上身,又或者要燒budget。我就當「畫家好低調好小心」呢句都假,但郭富城一個普通假畫人,做乜又變咗Rambo ? 廖啟智孫佳君又變晒海軍陸戰隊?

所以佢扭橋唔係唔得,但就好似顯到之前講嘅嘢好多餘了。一係你就畀多少少嘢,話畀大家知,個「現實」到底係點。否則,既然郭富城係大話精,咁我係咪可以假設之前啲劇情全部都可以不理?如果「現實」李問又真係三代做偽鈔又合理返啲,但又同張靜初講嘅嘢矛盾了。所以雖然聽落幾突兀,但都係要有個「全知」嘅莊文強視點出嚟講返,到底「真相」係乜。因為觀眾唔可以信任何郭富城講過嘅嘢嘛。

然後,就去到第二個扭橋嘅地方。就係呢個故事嘅另一重點:毒撚好危險!溝唔到女會死好多人!

故事最尾,大家知道咗周潤發係郭富城嘅想像,而泰(?)女秀清整咗容變咗阮文咁樣(張靜初)。呢個設定又係夠神經,但我鍾意,莊文強亦都話有參考《我的華麗皮囊》(The Skin I Live In)。

最後,去大陸搵返「真正」嘅阮文出嚟,佢話畀大家知,呀,郭富城嘛,住佢對面的。噢。(但,幾廿年前住你對面嘅人你都睇張畫就認得?)

兩個演繹,我學生話其實係張靜初講大話。但比較大路嘅講法係,張靜初講真話,咁即係郭富城講大話,根本張靜初冇同佢一齊過(所以畫面有補充,廖啟智同佢講:第時搵到錢你驚冇女人?)。結果郭富城最初講(未涉及發哥)嘅故事,窮人畫家落難情侶嘅故事,都係假嘅。亦因為張靜初係佢女神,到佢後來有錢,又遇上秀清後,索性將佢整到張靜初咁嘅樣。

其實事後諗返,我又唔覺得太亂嚟或太犯駁。但當場睇,個感覺就係好似畀人搵笨咁,好似睇完幾個鐘然後話畀你知「成個故事都係乜乜幻想出嚟」,或者睇推理小說話你知「偵探就係兇手」。第一個諗就天才,之後就玩到爛。而Unreliable narrator 呢個技巧已經玩到爛了,Gone Girl 出色,去到The Girl on the Train已經冇乜新意,玩到A Simple Favor更加唔多掂(但有演員搭救)。

歸根究底,呢類戲嘅先天問題都係差不多:頭段為咗舖排,點都唔可以太草草了事(留意A Simple Favor節奏已經好快,但都不能倖免),點都要搞返一個鐘。去到後尾穿橋,仲要結局,就草草了事。

解決方法?最簡單梗係拍長啲,兩個半,甚至三個鐘。但呢度又有票房嘅考慮,觀眾亦未必鍾意。更何況,《無雙》除咗想講呢個「想像嘅自己」vs 「真實嘅自己」外,仲要講埋技藝講搵到自己嘅舞台講做主角,仲要塞埋周家怡同埋個加拿大仔(其實呢度想點?)落去。兩個鐘,就拍唔到咁多嘢。

正如我寫套戲都分開兩篇文寫,仲可以收你兩次錢(如有)。

原文刊在作者Medium
作者 Facebook page

廣告